Түбән Кама районында зур чүплек бетерелде
Элегрәк ТР Экология министрлыгына Түбән Кама районында яшәүчеләрдән Шәңгәлче авылында санкцияләнмәгән чүплек турында мөрәҗәгать килгән иде. Кама аръягы идарәсе инспекторлары күчмә тикшерү уздырды, аның барышында көнкүреш калдыклары белән чүпләнгән котлованны теркәделәр. Законсыз чүплекнең мәйданы 5,1 мең кв. м тәшкил иткән, ә күләме - 1,5 мең куб. м.
Түбән Кама районы башкарма комитетына табигатьне саклау законнарының мәҗбүри таләпләрен бозуга юл куймау турында кисәтү һәм хокук бозуны бетерү турында таләп игълан ителде. Чүплек ирекле тәртиптә бетерелмәгәнлектән, министрлык Түбән Кама шәһәр судына дәгъва гаризасы биргән. Суд экологларның таләпләрен тулысынча канәгатьләндерде.
Бүгенгә санкцияләнмәгән чүплек бетерелгән, ә карьер рекультивацияләнгән.