Татарстан Республикасы Экология һәм табигать ресурслары министрлыгы

Чаллыда хосусый предприятиенең эше туктатылды

2013 елның 6 декабре, җомга

Ноябрь башында Татарстан Экология һәм табигый байлыклар министрлыгының Кама буе территориаль идарәсенә рәсми хөкүмәт порталының интернет-кабулияте аркылы бер предприятиенең морҗасыннан зәһәр исле куе төтен чыгуы турында хәбәр килгән иде.

Кама буе территориаль идарәсе белгечләре атмосфера һавасына зарарлы пычраткыч матдәләр чыгару факты буенча административ тикшерү башлап җибәрделәр. Аның барышында Сидоровка бистәсе Магистраль ур. 14 йортындагы җитештерү базасында урнашкан ул төтәүче морҗаның электр товарлары сату белән шөгыльләнүче хосусый эшмәкәр Игорь Глуховныкы булуы ачыкланды. Бу бина элегрәк җитештерү эшләре өчен файдаланылган, тикшерү мизгелендә бөтен җиһазлар һәм станоклар туктатылган булган. Хуҗаның әйтүенчә, бинаны ул хәзер электротехник продукция саклау өчен генә куллана, ә морҗа бинаны җылыта торган, дизель ягулыгында эшләүче котельный төтенен чыгара.

Лаборатория белгечләре шул урында атмосфера һавасына пычраткыч матдәләр чыгаруга анализ өчен пробалар алды. Тикшерү нәтиҗәсендә предприятиенең чыннан да һавага зарарлы (пычраткыч) матдәләр (углерод оксиды, азот диоксиды, корым) чыгару аркылы әйләнә-тирәлеккә тискәре йогынты ясавы ачыкланды. Җитмәсә, һавага зарарлы матдәләр махсус рөхсәтсез чыгарылган, шуның белән “Атмосфера һавасын саклау турындагы” ФЗ 14 ст 1 п. 04.05.1999 № 96-ФЗ бозылган.

Хосусый эшмәкәргә карата РФ АХКо 8.21 ст. 1 ө. буенча административ хокук бозу турында беркетмә төзелде, эш шәһәр судына тапшырылды.

Хәзерге вакытта, суд карары белән, предприятиенең эше 50 тәүлеккә туктатылган.

Татарстан Экология һәм табигый байлыклар министрлыгының Кама буе территориаль идарәсе материаллары буенча.

Министрлыкның матбугат хезмәте

БАРЛЫК ЯҢАЛЫКЛАРНЫ УКУ