Экология министрлыгында климат сәясәте һәм төбәкне декарбонизацияләү мәсьәләләре буенча ведомствоара эш төркеменең йомгаклау утырышы узды
Утырыш ирешелгән нәтиҗәләр турында фикер алышу һәм төбәкнең климат сәясәтенең киләчәк стратегиясен планлаштыру өчен республиканың төп министрлыклары, алдынгы сәнәгать предприятиеләре һәм фәнни-мәгариф учреждениеләре вәкилләрен берләштерде.
2025 елгы эш нәтиҗәләре буенча Татарстан Россия төбәкләре арасында углерод эзен киметү өлкәсендә алдынгы урыннарын раслады. Комплекслы якын килү, сәнәгатьтә һәм энергетикада инновацион технологияләр кертү нәтиҗәсендә республика зур уңышларга ирешә.
Экология министры урынбасары Ольга Манидичева чарада катнашучыларга «Татарстан Республикасының углерод нейтральлегенә юл» докладын тәкъдим итте, глобаль экологик тенденцияләрне исәпкә алып, төбәк үсешенең өстенлекле юнәлешләрен билгеләде.
КФУның Экология, биотехнология һәм табигатьтән файдалану институты директорының фәнни эшчәнлек буенча урынбасары Мария Кожевникова «Карбон — Идел буе» карбон полигонының һәм фәнни җәмәгатьчелекнең декарбонизация мәсьәләләрен чишүдәге эш нәтиҗәләре белән уртаклашты.
Төбәкнең алдынгы предприятиеләре вәкилләренең чыгышлары аеруча кызыксыну уятты. «Татнефть» ГАҖнең әйләнә-тирә мохитне саклау бүлеге башлыгы Петр Кубарев компаниянең парник газларын чыгаруны киметүгә инновацион якын килүләре турында сөйләде. «Татнефть» хәзерге вакытта углерод берәмлекләренең илкүләм реестрында теркәлгән климат проектлары саны буенча төбәк лидеры булып тора.
СИБУРның углерод эзен киметү өлкәсендәге эше турында «Казаноргсинтез» экология буенча җитәкчесе Александр Жалюк, предприятие Экология идарәсенең баш эксперты Роман Емелюшин, шулай ук СИБУРның «климатик чишелешләр» блогының өлкән менеджеры Татьяна Романенкова сөйләде.
Сибурның климат портфеленең гомуми күләме парник газлары чыгаруны 11,3 млн углерод берәмлегенә киметүне тәэмин итә торган чараларны гамәлгә ашыруны үз эченә ала.
«Бездә проектлар портфеле төрле, иң эресе «Нижнекамскнефтехим»да гамәлгә ашырылган, аның потенциалы — 5,7 млн.углерод берәмлеге, һәм бер ай элек 1,9 млн берәмлек чыгарылган», – дип сөйләде СИБУРның «климатик чишелешләр» блогы өлкән менеджеры Татьяна Романенкова.
«Казаноргсинтез» предприятиесендә яңа климат проекты — изопропилбензол җитештерүне модернизацияләү гамәлгә ашырыла. Яңарту һәм реконструкция атмосферага чыгарыла торган матдәләрне 20% ка киметергә, шулай ук әлеге производствода энергия ресурсларын куллануны 68% ка киметергә мөмкинлек биргән. Климат проекты валидация турында уңай бәяләмә алып, РФ реестрына теркәлү стадиясендә тора.
Шушы һәм СИБУРның башка инициативалары нәтиҗәсендә төбәк Россия реестрында теркәлгән чыгарылган углерод берәмлекләре саны буенча алдынгы позициядә тора.
Утырыш азагында бүләкләү тантанасы булды. Мария Владимировна Кожевникова (КФУ), Петр Николаевич Кубарев («Татнефть» ГАҖ) һәм Александр Владимирович Жалюк (СИБУР предприятиесе – «Казаноргсинтез») төбәкнең экологик һәм климат инициативаларын үстерүгә керткән өлешләре өчен Татарстан Республикасы Экология һәм табигать ресурслары министрлыгының рәхмәт хатлары белән бүләкләнделәр.