Казанда «Бүл. Сакла» студентлар фестивале узды
Казанның IT-паркындагы «Кайнау ноктасы» мәйданчыгында «Бүл. Сакла» студентлар фестивале узды, ул шәһәрнең 11 югары уку йортыннан студентларны берләштерде.
Чара белем бирү һәм практик блокларны үз эченә алды. Катнашучылар хайваннарның табигый биотоплары, калдыкларны эшкәртү турында белделәр һәм квизда экологик трендлар буенча уйнадылар.
Иҗади һәм практик мастер-классларда материалларны икенчел куллану техникасы тәкъдим ителде: китап экокыстыргычлары, икенчел чималдан бизәнү әйберләре ясау, экологик шәмнәр җитештерү.
Фестивальдә «Яшел старт» конкурсына йомгак ясалды. Бер ай дәвамында студент берләшмәләре экоакцияләр үткәреп, анда катнашып килделәр. Казан милли тикшеренү техник университетының Волонтерлык үзәге җиңүче булды.
Фестивальне оештыруда ярдәм иткән өчен экологик агарту һәм иҗтимагый оешмалар белән хезмәттәшлек бүлеге җитәкчесе Алинә Җамалетдинова рәхмәт хаты белән бүләкләнде.
Шулай ук фестиваль кысаларында «Экокультура» интеллектуаль уеннары турнирының икенче этабы узды. Күчмә студентлар кубогының абсолют җиңүчесе һәм иясе Казан федераль университетының Экология, биотехнология һәм табигатьтән файдалану институты командасы булды.
Мондый вакыйгаларны уздыру яшьләрдә экологик культура формалаштыруга зур өлеш кертә, бу «Экологик иминлек» илкүләм проекты максатларына ирешүдә мөһим адым булып тора.
Белешмә: чара ТР Экология һәм табигать ресурслары министрлыгы һәм «Татнефть» хәйрия фонды ярдәмендә үткәрелде.