Татарстан Республикасы Экология һәм табигать ресурслары министрлыгы

Әйләнә-тирәлекне саклау буенча IV бөтенроссия съезды башланды

2013 елның 2 декабре, дүшәмбе

Бүген Мәскәүдә, “Крокус Экспо” халыкара күргәзмә үзәгендә Әйләнә-тирәлекне саклау буенча IV бөтенроссия съезды башланды. Россия Федерациясе Табигый байлыклар һәм экология министрлыгы оештырган бу съездның максаты булып кискен экологик проблемаларны тикшерү, аларны чишү юлларын эзләү, Россиянең табигать саклау законнарын камилләштерү тора.

Профессиональ экологлар даирәсенең шушы иң зур бәхәс мәйданында Россиянең 83 регионыннан 2 меңнән артык кеше катнаша. Татарстан Республикасыннан килгән 52 делегат, исегезгә төшерәбез, әлеге IV съездга делегатлар күрсәтү буенча 3 октябрьдә Казанда узган территориаль конференциядә сайлап алынган иде. Алар арасында Татарстан Экология һәм табигый байлыклар министрлыгы, Татарстан буенча Россия Табигать күзәтчелеге, Татарстан Урман хуҗалыгы министрлыгы, Татарстан Авыл хуҗалыгы һәм азык-төлек министрлыгы хезмәткәрләре, Татарстан Җәмәгать палатасы вәкилләре, иң яхшы технологияләр иңдерүче индустрия комплексы предприятиеләре җитәкчеләре һәм экологлары, муниципалитет вәкилләре, экологик җәмәгатьчелек хәрәкәте активистлары, фән мәгариф һәм табигать саклау органнары вәкилләре бар.

Съездның эш сессияләрендә әйләнә-тирәлекне саклау өлкәсендәге хәлиткеч мәсьәләләр карала. Аерым алганда – табигатьтән рациональ файдалану, әйләнә-тирәлекнең сыйфатын яхшырту, экологик куркынычсызлыкка мониторинг һәм контроль, халык хуҗалыгында экологиянең роле, Россия Федерациясе субъектлары тәҗрибәсе.

Съезд делегатлары егермедән артык түгәрәк өстәлдә, дискуссиядә һәм презентация сессияләрендә, “Табигать саклау өлкәсенең агымдагы хәле: ун елда нәрсә үзгәрде?” һәм “Региональ политиканың экологик аспектлары” дигән ике төп конференциядә катнашачак, алары бүген була. Бер конференциядә Татарстан Экология һәм табигый байлыклар министры Артем Сидоровның Татарстан Республикасының экологик политикасы аспектлары турындагы чыгышы планга кертелгән.

Съезд кысаларында шулай ук беренче Бөтенроссия экологик яшьләр форумы уздырылачак, гражданнардан экологик җинаятьләр һәм бозулар турында шикаятьләр кабул итү буенча мәгълүмәт системасы тәкъдим ителәчәк, әйләнә-тирәлекне саклау темасына иң яхшы журналистик материаллар өчен бирелә торган, Василий Песков исемендәге “Табигать белән гармониядә” премиясе тапшырылачак. Моннан тыш, “Россия аллеясы” бөтенроссия акциясе башлану турында игълан ителәчәк, шул уңайдан ачык тавыш бирү юлы белән һәр 83 регионның символы дип танылган 83 үсемлектән торган аллея утыртылачак.

Министрлыкның матбугат хезмәте

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ