ТР Экология министрлыгы экологик хисаплылыкны җаваплы тутырырга чакыра
Татарстан Республикасы Экология министрлыгы 2024 елда җитештерү экологик контролен (ПЭК) оештыру һәм гамәлгә ашыру нәтиҗәләре турында 2685 хисап алды. Бу 2023 ел белән чагыштырганда 10% ка күбрәк, предприятиеләрнең экологик контрольгә җәлеп ителү дәрәҗәсенең артуын күрсәтә.
Әмма документларны тикшерү шактый хокук бозуларны ачыклады. Төп проблемалар арасында – тапшырылган мәгълүматларның әйләнә-тирә мохиткә тискәре йогынты ясый торган объектларның факттагы торышына туры килмәве, шулай ук мәгълүматның тулы булмавы һәм җитәрлек дәрәҗәдә детальләштерелмәве.
Мондый хокук бозуларны ачыклау табигатьтән файдаланучыны расланган хәвеф-хәтәр индикаторлары нигезендә мәҗбүри таләпләрне бозган субъектлар категориясенә кертү өчен нигез булып тора. Гамәлдәге законнар нигезендә, бу Министрлык тарафыннан контроль (күзәтчелек) чаралары уздыруга китерә.
Хисапларда тупас туры килмәү фактлары буенча Татарстан Республикасы прокуратурасы органнарына 5 хат җибәрелде инде.
Министрлык искәртә: бирелгән мәгълүматларның төгәллеге, тулылыгы һәм дөреслеге — РФ табигатьне саклау законнары нигезендә табигатьтән файдаланучының турыдан-туры бурычы. Дөрес булмаган хисаплылык котылгысыз рәвештә административ йогынты чараларын куллануга китерәчәк.
Хисапларны тутыру мәсьәләләре буенча консультацияләр сорап, Министрлыкның Экологик күзәтчелек дәүләт инспекциясе идарәсенә 8 (843) 267-68-40 телефоны буенча мөрәҗәгать итәргә була.