Әлмәттә социаль-экономик мәсьәләләр буенча түгәрәк өстәл уздырылды

          Әлмәт муниципаль районы башкарма комитетында Татарстан Президентының Дәүләт Советына 2014 елга карата Юлламасында билгеләнгән социаль-экономик бурычларны тормышка ашыру мәсьәләләре буенча түгәрәк өстәл утырышы булып узды.
        Экологик культура һәм әйләнә-тирәлекне саклау елының төп бурычларын Әлмәттә тормышка ашыру турында доклад белән Татарстан Экология һәм табигый байлыклар министрлыгының Көньяк-көнчыгыш территориаль идарәсе башлыгы Альберт Маликов чыгыш ясады. – 2013 елның 10 аенда Көньяк-көнчыгыш территориаль идарә инспекторлары 599 тикшерү башкарган, 242 предприятие тикшерелгән. Докладта Россиядә беренче буларак, үзенең экологик политикасына ярашлы рәвештә, иярчен нефть газын утильләштерү кимәлен 95%ка җиткергән “Татнефть” компаниясенең эше дә билгеләп үтелде.
         Агымдагы елда “СЗМН” ААҖнең “АК Транснефть” ААҖ предприятиесе “Кәләй” нефть кудыру станциясендә, атмосфера һавасын пычратуны киметү максатында, өч ЖБР-10000 резервуарын сүткән, гөмбәз түбәле һәм алюмин эретмәдән ясалган понтонлы 2 РВСП резервуары реконструкцияли; понтон углеводородлар ташлауны 80%ка кадәр киметергә мөмкинлек бирә һәм куркынычсыз файдалануны тәэмин итә.
        Оперативлык максатында Экология министрлыгы атмосфера һавасына автоматик контроль буенча ике пост булдырган. Стационар постлар белән иңләнмәгән территорияләрне тикшерү өчен Министрлык быел атмосфера һавасына контроль буенча күчмә автоматик станция дә бүлеп биргән, ул үлчәүләрне стационар хәлдә дә, йөреп тә башкара ала. Күчмә станция азот оксидлары, аммиак, углерод оксиды, күкерт диоксиды, сероводород, углеводородлар, ароматик углеводородлар (бензол, толуол, этилбензол, ксилол,  стирол) кебек зарарлы катнашмалар концентрациясен үлчи.
           “Саф һава” операциясе барышында Көньяк-көнчыгыш территориаль идарә инспекторлары тарафыннан, МВДның ТР буенча ГИБДД идарәсе инспекторлары белән берлектә, 952 автомашина тикшерелгән, 207 автомашинада нормадан уздыру ачыкланган, физик затларга 207 беркетмә, автотранспорт предприятиеләренең җаваплы затларына 14 беркетмә төзелгән.
          2013 елның 1 январеннан 30 октябренә кадәрге чорда Көньяк-көнчыгыш территориаль идарә тарафыннан 98 рөхсәтсез калдыклар ташлау урыны ачыкланып, республиканың Экологик картасына кертелгән. 95е бетерелгән, бу барысының 96%ына тиң. Рөхсәтсез калдыклар ташлауның 3 факты контрольдә тотыла.
         Агымдагы елда Идарә Әлмәт районында җир асты байлыкларыннан файдалану өлкәсендә табигать саклау законнарын бозуның 18 очрагын ачыклаган. Бозучыларны ачыклау һәм җавапка тарту буенча эш полиция хезмәткәрләре белән бергә алып барыла.
Әлмәттә уку йортларының дөньяга экологик караш, экологик культура формалаштыру, практик табигать саклау алымнарына өйрәтү буенча эшчәнлегенә дә җитди игътибар бирелә.