Лениногорск районында табигатьне саклау законнарын бозулар ачыкланды

2025 елның 30 июне, дүшәмбе

Күзәтчелек эшчәнлеге кысаларында ТР Экология һәм табигать ресурслары министрлыгының Көньяк-Көнчыгыш идарәсе белгечләре Лениногорск районын тикшерделәр. Тикшерү нәтиҗәсендә төзелеш һәм башка калдыкларның рөхсәтсез ике зур чүплеге табылды.

Беренче участокта тимер-бетон әйберләр һәм пычранган грунт ташлау урыны теркәлде. Пычрану мәйданы 2 185 кв.метрдан артык, ә калдыклар күләме 1 500 кубометр чамасы.

Икенче участокта төзелеш калдыкларыннан тыш, автомобиль шиннары җыелган. Чүплек мәйданы монда – 2 840 кв.метр, калдыклар күләме – 2 000 кубометр чамасы.

Экология министрлыгы Лениногорск районы башкарма комитеты адресына мондый хокук бозуларга юл куймау һәм чүплекләрне бетерү өчен чаралар күрергә кирәклеге турында кисәтү юллады.