Чистайда экологлар 1000 кв.м. якын мәйданлы ике чүплек таптылар

2025 елның 4 июне, чәршәмбе

Чистай районын мониторинглау кысаларында Идел-Кама идарәсе инспекторлары рөхсәтсез ике чүплек урынын ачыкладылар.

Калдыкларның беренче урыны Чистайда, Биектау янында табылды. Хокук бозуның гомуми мәйданы – 140 кв.м, күләме – 119 куб.м.

Икенче законсыз чүплек урыны вертолет очышыннан соң ачыкланды. Нәриманов урамында төзелеш калдыклары чүплеге табылды. Гомуми мәйданы – 840 кв.м, күләме – 210 куб.м.

Чистай районы башкарма комитеты адресына табигатьне саклау законнарының мәҗбүри таләпләрен бозуга юл куймау һәм чүплекләрне бетерү турында кисәтүләр җибәрелде.