Бөек Җиңү көне белән котлыйбыз һәм геройларны «Без сезнең исемнәрегезне хәтерлибез...» рубрикасында искә алабыз.
Бүген, Бөек Ватан сугышында Җиңүнең 80 еллыгы көнендә, Үзәк идарәнең өлкән белгече Алинә Габдрахманованың сеңлесе Энҗе Галимуллина үзенең бабасы истәлегенә шигырь сөйли.
Салих Шәйхетдин улы Шәйхетдинов 1912 елның 12 декабрендә Балтач районының Нуринер авылында туа. 1941 елда, 28 яшендә элемтәче булып сугышка алына. Мәскәү өчен сугышта катнаша һәм Беларусьны азат итә.
Батырлыгы һәм кыюлыгы өчен Салих Шәйхетдинов «Батырлык өчен» медале һәм 1 дәрәҗә Ватан сугышы ордены белән бүләкләнгән. Ул бөтен сугышны узып, исән-сау килеш өенә кайта. Салих Шәйхетдинов 1992 елда вафат була.
Бүген, илебез өчен мөһим булган бу көндә, һәркайсыбыз үз гаиләсе, бабалары өчен горурлык хисе кичерә. Аларның батырлыгы, ныклыгы һәм каһарманлыгы безгә баш өстендәге тыныч күкне бүләк итте. Җиңү өчен рәхмәт сезгә! Без хәтерлибез! Без горурланабыз!