Территорияләрне санитар чистарту буенча икеайлык барышында Идел-Кама идарәсе белгечләре Чистай районында зур чүплек таптылар
Чистай шәһәре территориясен мониторинглау барышында Һ.Такташ урамында җитештерү һәм куллану калдыкларын рөхсәтсез җыю урыны ачыкланды. Пычранган мәйдан – 4610 квадрат метр, ә җыелган калдыклар күләме – 1844 куб.метр. Калдыклар составына сортлаштырылмаган көнкүреш чүп-чарлары (эре габаритлы калдыкларны да кертеп) һәм төзелеш һәм ремонт эшләре калдыклары керә.
Татарстан Экология министрлыгының Идел-Кама идарәсе инспекторлары Чистай шәһәре башкарма комитетына табигатьне саклау законнарын бозуга юл куймау турында кисәтү бирделәр. Шәһәр администрациясе ачыкланган хокук бозуларны 60 көн эчендә бетерергә тиеш.
Без Татарстан Республикасының барлык халкын санитария икеайлыгында актив катнашырга һәм шәһәрләребезнең һәм авылларыбызның экологик чисталыгын саклауга ярдәм итәргә чакырабыз. Бергәләп без Татарстанны яшәү өчен чистарак һәм куркынычсызрак итә алабыз!