Татарстанда иске шиннарны эшкәртүгә кабул итүнең 30дан артык пункты булдырылды
Татарстанда «Экологик иминлек» илкүләм проектына ярдәм йөзеннән автопокрышкаларны җыю һәм аларны алга таба эшкәртү буенча масштаблы проект гамәлгә ашырыла.
Теләгән һәркем табигатьне саклауга үз өлешен кертә ала: моның өчен гаризаны «Татнефть» ГАҖ рәсми сайтында калдырырга яисә автозаправка станцияләрендәге яки шәһәр мәйданчыкларындагы кабул итү пунктларына иске покрышкаларны алып килергә кирәк.
Бүгенге көндә эшкәртү участоклары Россиянең 17 шәһәрендә, шул исәптән Лениногорск һәм Түбән Камада эшли. Июнь ахырына кадәр тулы технологик цикл Казанда да гамәлгә ашырылачак. Татарстанда шиннарны «Татнефть» автозаправка станцияләрендә тапшырырга мөмкин.
АЗС адреслары исемлеген сылтама буенча карап була: https://uvr.tatneft.ru/punkti-priema--shin-u-naseleniya?lang=ru&ysclid=m7xat0en1f524167915 һәм ТР Экологик картасында: https://ecokarta.tatar.ru/
Покрышкаларны утильләштерү ике этапта бара: башта шиннарны ваклыйлар, аннары термик рәвештә пиролиз ысулы белән эшкәртәләр. Пиролиз (химик таркалу) процессында бер тонна резин валчыгыннан 500 кг пиролиз конденсаты хасил була. Конденсатны ТАНЕКОга җибәрәләр, аннан изобутан ясыйлар. Аннары «Татнефть» производстволарында изобутаннан изопрен каучук табалар, ул шиннар җитештерү өчен кулланыла.
Белешмә: Россиядә ел саен 800 мең тоннага якын шин барлыкка килә, шуның яртысы Идел буе һәм Үзәк федераль округларга туры килә. Мондый калдыкларны утильләштерү проблемасын хәл итү өчен «Татнефть» ГАҖ шиннар җыю һәм эшкәртүнең масштаблы проектын үстерә. Якындагы елларда компания тарафыннан елына ким дигәндә 400 мең тонна чимал эшкәртү планлаштырыла.