Бүген Дәүләт Советында «Бер-береңә экология турында» социаль әһәмиятле проектларның республика конкурсына йомгак ясалды
Быел конкурс финалына авторлары һәм коллективлары "Экологик иминлек" илкүләм проектына ярдәм йөзеннән үзләренең экопрограммаларын гамәлгә ашыруга грантлар алган җиде проект үтте. Яшь экологлар белән Экология, табигатьтән файдалану, агросәнәгать һәм азык-төлек сәясәте комитеты рәисе Азат Хамаев, Дәүләт Советы депутаты, Россия экология җәмгыятенең Татарстан бүлеге җитәкчесе Азат Җиһаншин һәм экология министры урынбасары Егор Тарнавский очрашты.
«Бер-береңә экология турында» социаль әһәмиятле проектларның республика конкурсы Азат Җиһаншин ярдәме белән үткәрелә. РЭҖ Татарстан бүлеге җитәкчесе билгеләп үткәнчә, проект гамәлдә булган өч ел эчендә барлыгы 300дән артык гариза җибәрелгән. Быел җиде җиңүче Россия экология җәмгыятенең Татарстан бүлегеннән үзләренең экологик идеяләрен тормышка ашыру өчен 300 мең сумлык грант алган. «Әлеге проект – социаль әһәмияткә ия чара, анда мәктәп укучылары да, урта махсус уку йортлары, техникумнар, көллиятләр һәм югары уку йортлары укучылары да катнаша, – дип билгеләп үтте Азат Җиһаншин. – Һәм бүген без үзебезнең лауреатларыбызны, җиңүчеләребезне чакырдык, алар үз проектларын теоретик яктан гына әзерләп калмыйча, аларны тормышка да ашыралар әле. Бу безнең актив, яшь кешеләр, алар вакыт табалар һәм экология идеясе белән «яналар», үз табигатен яраталар, димәк, үз илен, үз Ватанын яраталар һәм үз иленең патриотлары булып торалар».
Катнашучыларга сәламләү сүзе белән шулай ук ТР экология министры урынбасары Егор Тарнавский да мөрәҗәгать итте. «Сез гамәлгә ашырган проектлар безнең республиканың экологик культурасында яңа векторга әверелде, – дип ассызыклады Егор Тарнавский, балаларга мөрәҗәгать итеп, – ышанам ки, сез хәзер салган экологик үсеш яхшы нәтиҗәләр бирәчәк, ә без Экология министрлыгыннан сезгә һәрвакыт ярдәм күрсәтәчәкбез».
Җиңүче авторлар үз чиратында проектларны гамәлгә ашыру турында сөйләделәр. Балалар 67 экологик чара, төрле мастер-класслар, уеннар, үсемлекләр утырту дәресләре, шулай ук табигать киңлекләрен чистарту һәм төзекләндерү буенча акцияләр үткәргән.
Чара бүләкләр тапшыру белән тәмамланды.