179 тонна макулатура җыелган: Татарстан «Экология» илкүләм проектына ярдәм йөзеннән «БумБатл» Бөтенроссия акциясендә алтынчы урынны алды
«БумБатл» макулатура җыю буенча рекорд куйды - Бөтенроссия акциясенең бишенче сезонында катнашучылар 144 мең тонна кәгазь калдыклары җыйганнар, бу узган ел белән чагыштырганда 1,5 тапкыр күбрәк. Татарстан Республикасыннан катнашучылар эшкәртүгә 179 тоннадан артык макулатура тапшырган. Төбәк ил субъектларының гомуми зачетында алтынчы урынны алды.
Кәгазьне мәктәп укучылары, студентлар, волонтерлар, дәүләт һәм шәхси предприятиеләр хезмәткәрләре тапшырды – экология турында кайгыртуны төрле активистлар күрсәтте. «Кәгазь сугышына» зур өлешне гаиләләр кертте – «БумБатл»ны илнең 4,7 меңнән артык гаиләсе хуплады. Катнашучылар бергәләп 2023 елга караганда 49 мең тоннага күбрәк макулатура җыйганнар.
Мәктәпкәчә белем бирү оешмалары арасында Татарстан гомуми пьедесталда беренче һәм өченче урыннарны яулады. Балалар һәм тәрбиячеләр ай ярым дәвамында эшкәртү өчен кәгазь һәм картон җыйганнар. Акция йомгаклары буенча беренче урынны Мамадышның 5 нче «Бәләкәч» балалар бакчасы алды. 56 катнашучы 6,7 тонна макулатура җыеп, эшкәртергә җибәрә алган. Бронзага Казанның 28 нче «Сказка» балалар бакчасында тәрбияләнүчеләр лаек булды: акциядә 35 бала катнашкан.
«БумБатл»га ярдәм йөзеннән бөтен Россия буенча «Экосистема» хәрәкәте активистлары 700дән артык интерактив белем бирү чарасы уздырды. ЭКОдәресләр, мастер-класслар, кәгазь фестивальләре һәм калдыкларны сортларга аеру һәм эшкәртү объектларына экскурсияләр – волонтерлар төрле яшьтәге һәм һөнәр ияләрен йомык цикллы икътисад принциплары белән таныштырдылар.
Исегезгә төшерәбез, «БумБатл» макулатура җыю буенча Бөтенроссия акциясе «Экология» илкүләм проектына ярдәм йөзеннән бишенче ел рәттән узды. Масштаблы инициативада илнең 89 төбәгеннән 3 миллионнан артык кеше катнашты. 2023 елдан проектны оештыруда «Экосистема» Бөтенроссия иҗтимагый экологик хәрәкәте катнаша. «БумБатл»ны уздыру дәверендә анда 8,9 миллионнан артык кеше катнашкан, алар 305 мең тоннадан артык макулатура җыйганнар.