Профориентация дәресе. Чаллы мәктәп укучыларын эколог һөнәре белән таныштырдылар
Кама яны территориаль идарәсе экологлары өлкән сыйныф укучыларына булачак һөнәрләрен билгеләргә ярдәм итә. «Экологик белем һәм тәрбия» программасы кысаларында экологик күзәтчелекне тәэмин итү бүлегендә экскурсия оештырылды.
Чаллының 19 нчы мәктәбенең 8-9 нчы сыйныф укучыларын лаборатория эшенең үзенчәлекләре белән таныштырдылар, тәҗрибәләр күрсәттеләр, һаваны контрольдә тотуның күчмә экологик станциясе турында сөйләделәр.
Идарә белгечләре балаларга аларның җаваплылыгы өлкәсенә Чаллы шәһәре генә түгел, ә тагын 7 муниципаль район керүе турында аңлаттылар. Аларның территорияләрендә экологик күрсәткечләргә даими мониторинг үткәрелә, шулай ук хокук бозулар ачыкланган очракта ашыгыч ярдәм күрсәтелә.
Дәрес азагында әйләнә-тирә мохитне саклау өлкәсендә төгәл гражданлык позициясен формалаштыруның мөһимлегенә йомгак ясалды. «Уңышка һәм иминлеккә иң кыска һәм ышанычлы юл – сыйфатлы белем һәм үзлегеңнән нык белем алу. Тик ул гына безгә тормышның теләсә кайсы хәлендә дөрес карарлар кабул итү өчен кирәкле белем багажын бирә», – дип ассызыкладылар идарә белгечләре.
Экологлар практик дәрес укучыларга һөнәр сайлауга аңлы рәвештә якын килергә һәм экологик юнәлешле белгечлекләргә кызыксынуны арттырырга ярдәм итәр дип өметләнәләр.