Экологлар битум түгелгән җирне тәртипкә салды

Бүген Казанның Дәрвишләр бистәсендә киң күләмле өмә уздырылды. Битум калдыкларын җыештырырга һәм территориядә агач утыртырга өч йөзләп кеше чыкты. Алар арасында Татарстан Экология һәм табигый байлыклар министрлыгы хезмәткәрләре, экологик җәмәгать оешмалары, шул исәптән “Рус география җәмгыяте”, “Бүтәнгә булыш” җәмгыяте, “ЭКА” халыкара экология оешмасы, “Экологик культура һәм политика үзәге” оешмасының региональ бүлекчәсе вәкилләре, К(И)ФУ, КДАУ, КФТТУ-КХТИ, КДТУ (КАИ) студентлары, Дәрвишләр бистәсендә яшәүчеләр, “Медик” бакчачылык ширкәте дачниклары, журналистлар бар иде. Өмә барышында кыен керешле урыннар битумнан чистартылды, 1200ләп нарат, миләш, каен утыртылды. Үсентеләрне “Шәһәр яны урман хуҗалыгы” идарәсе һәм “Парк-сервис” ландшафт предприятиесе бирде.
Татарстан Экология һәм табигый байлыклар министры Артем Сидоров журналистлар белән әңгәмәдә: “Битумны җыеп “Возрождение” ЯАҖенә ташу 2013 елның июль азагыннан бирле башкарыла. Барлыгы 375 автомашина, 2300 тонна чамасы битум ташылды”, – дип әйтте. Һәм битум җыюда, территорияне рекультивацияләүдә катнашучыларның барысына да рәхмәт белдерде.
Битумны чистартуга ПМК-2, “Шәһәр төзекләндерү” МУП, “Гормосты” МУП, “Дрэу” МУП (Казанның Киров районы), “Горводзеленхоз” МУП, “Каздорстрой” ААҖ, “КМПО” ААҖ, “Юл хәрәкәте куркынычсызлыгы” идарәсе, “Гидроспецстрой” идарәсе, “Метелица” ҖЧҖ оешмалары, аерым кешеләр җәлеп ителде.
Бүген шулай ук битум аккан территориядән Татарстан Экология һәм табигый байлыклар министрлыгының Үзәк махсус аналитик контроль инспекциясе туфрак пробалары алды. Элегрәк шул урындагы һавага, туфракка, “Медик” бакчачылык ширкәте коеларындагы суга анализ үткәрелгән иде. Бозышлар ачыкланмады. Артем Сидоровның әйтүенчә, бу территориядә контроль чаралары дәвам итәчәк.