Экология берләштерә. II Бөтенроссия экофестиваленә Әлмәткә Россиянең 18 шәһәреннән 120 студент килгән
Әлмәттә «Яшел Адым – Зеленый Шаг 2024» II Бөтенроссия студентлар экология фестивале старт алды. Биредә, «Югары нефть мәктәбе» Әлмәт дәүләт технология университеты базасында, Татарстаннан, Мәскәүдән, Санкт-Петербургтан, Самара өлкәсеннән, Ставрополь краеннан, Башкортстаннан, Дагыстаннан, Иваново, Волгоград, Новосибирск өлкәләреннән, Кырымнан һәм Удмуртиядән 120 студент берләшкән. Аларны 4 көн дәвамында тренинглар, панель дискуссияләр, мастер-класслар, шулай ук әйләнә-тирә мохитне саклауга юнәлдерелгән кейслар чишелеше көтә.
Фестивальнең тантаналы ачылышында ТР Экология министрлыгының экологик агарту һәм иҗтимагый оешмалар белән хезмәттәшлек бүлеге башлыгы Ольга Артемьева да катнашты, ә «Су ресурслары мониторингы» лекториясе кысаларында фестивальдә катнашучылар белән Министрлыкның экологик мониторинг бүлеге башлыгы Елена Закирова очрашты. Катнашучыларга Татарстанда су объектларын күзәтүнең территориаль системасы, контрольдә тотыла торган параметрлар, алына торган пробалар саны һәм республикада җир өсте суларының сыйфаты турында җентекләп сөйләделәр.
Ольга Артемьева чыгышында ассызыклаганча, бүген экология фән генә булудан туктады, экология – ул тренд, яшәү рәвеше: «Безгә һәр кешенең әйләнә-тирә мохитне саклауга үз өлешен кертә алуы мөһим. Моны фикердәшләр мохитендә эшләү күпкә җиңелрәк, һәм мондый фестивальләр бөтен Россия буенча мәнфәгатьләр буенча дуслар табарга мөмкинлек бирә».
Фестивальнең беренче көнендә командалар 3 трек буенча квестлар һәм белем бирү модульләре үтте: ЭнергоБум, ЭкоВоздух, ЭкоВолна. Активлык кысаларында иң актив командаларга жетоннар тапшырыла. Бер юнәлеш буенча иң күп бүләк җыйган җиңүчеләр күчмә фестиваль кубогын алачак.
«Яшел Адым – Зеленый Шаг 2024» II Бөтенроссия студентлар экология фестивален Әлмәт дәүләт нефть институты, «Татнефть» хәйрия фонды ярдәмендә ТРның «Чиста булачак» төбәк яшьләр иҗтимагый оешмасы оештыра.