«Экология безне берләштерә». Александр Шадриков татарстанлыларны Бөтендөнья әйләнә-тирәлекне саклау көне белән, ә барлык экологларны һөнәри бәйрәм белән котлады!
Хөрмәтле табигатьне саклау ведомстволары хезмәткәрләре, тармак ветераннары һәм республика халкы! Бу дата-безнең уртак бәйрәмебез, чөнки экология сүзе бүген тормыш сүзенең синоними буларак кабул ителә. Эчкән суының, сулаган һаваның чисталыгын, оныкларына каласы җирнең нинди буласын кайгыртмаган бер генә кеше дә юк.
Бу көн – безнең тирәдәге дөньяны кайгырту символы, әйләнә-тирәбезнең кыйммәте, һәр чишмә, һәр агач, тере зат өчен шәхси җаваплылыгыбыз турында искә төшерү көне. Мин эколог коллегаларыбызны, фикердәшләребезне, һөнәри эшчәнлекләре белән бәйле һәм җан чакыруы буенча табигатьне саклау, аның байлыкларын арттыру, күптөрлелеген саклау мәсьәләләре белән мәшгуль булган барлык кешеләрне котлыйм. Бу байлыкның чисталыгына кешенең сәламәтлеге, димәк, җирдәге киләчәк тә бәйле.
Бер максат – бу дөньяны яхшырак, чистарак, игелеклерәк итү өчен берләшкән волонтерларыбызны, активистларыбызны һәм энтузиастларыбызны котлыйм. Экология мәсьәләләре белән кызыксынучы һәм тормыш шартларын иң беренче чиратта үзеңнән, үз йортыңнан, урамыңнан, районыннан, шәһәреннән үзгәртә башларга, яхшыртырга кирәклеген аңлаучы кешеләр саны күбәя бара.
Безнең халык, яшьләр берләшмәләре, юннатлар ел саен массакүләм өмәләргә чыгалар, елгалар һәм күлләр чисталыгы өчен көрәшәләр, экологик чаралар һәм форумнар үткәрәләр.
Без сезнең белән уникаль урында, бөек Иделнең үзәгендә яшибез, милли паркларның, тыюлыкларның һәм күлләрнең матурлыгына сокланабыз. Бу табигый байлыкны саклау безнең уртак һөнәребезгә әйләнде!
Экология безне берләштерә!