Татарстанда «Чишмәләрне бергә төзекләндерик!» социаль проектының чираттагы этабы төгәлләнде

Бүген Лаеш районы Караеш авылында, Татарстан Экология һәм табигый байлыклар министрлыгы, Лаеш районы администрациясе һәм Татарстан Яшьләр берлеге ярдәме белән Efes Rus компаниясе төзекләндергән саф сулы чишмәне ачу тантанасы булып узды. Тантанада Татарстан Экология һәм табигый байлыклар министрлыгының Үзәк территориаль идарәсе башлыгы Илһам Сабиров, Efes Rusның регионнарда корпоратив мөнәсәбәтләрне үстерү буенча директоры Станислав Аверьянов, Татарстан Яшьләр берлеге рәисе Светлана Пермякова, авыл башлыгы Людмила Стерякова һәм авылда яшәүчеләр катнашты.

Татарстан Экология һәм табигый байлыклар министрлыгының Үзәк территориаль идарәсе башлыгы Илһам Сабиров “Чишмәләрне бергә төзекләндерик!” социаль проектын тормышка ашыруда актив катнашучыларның барсына да бөтен министрлык исеменнән рәхмәт белдерде. Статистика буенча, бүгенге көндә Татарстан буенча 3134 чишмә теркәлгән, һәм, Илһам Сабиров сүзләренчә, бу тиңдәшсез табигать байлыкларын саклау, карап тоту, аларның тирә-ягын экологик тәртиптә тоту безнең арытаба бурычыбыз булып тора.

Бу чара белән “Чишмәләрне бергә төзекләндерик!” милли проектының еллык этабы төгәлләнә, ә аның максаты – республика халкына эчә торган саф су бирү. Проектны тормышка ашыруның бөтен дәверендә Татарстанда 5 чишмә төзекләндерелде. Реконструкция барышында чишмәләрне чистарту һәм халыкка уңайлыклар ясау максатында төзелеш эшләре башкарылды.

Белешмә өчен: “Чишмәләрне бергә төзекләндерик!” социаль проектын Efes Rus компаниясе 2010 елда Диңгез буе краенда, Ульяновск һәм Калуга өлкәләрендә башлап җибәрде. 2012 елда проект Татарстанда дәвам иттерелде. Ул чакта, Татарстан Экология һәм табигый байлыклар министрлыгы һәм Лаеш район администрациясе белән бергә, Имәнкискә, Кече Елга һәм Пәрәү авылларында беренче 3 чишмә төзекләнде. Бу проектны тормышка ашыруның 4 елында Efes Rus эш иткән регионнарда барлыгы 50дән артык чишмә яңартылды.