Татарстан Республикасы Экология һәм табигать ресурслары министрлыгы

Әйләнә-тирәлекне саклау буенча IV Бөтенроссия съездына делегатлар сайланды

2013 елның 3 октябре, пәнҗешәмбе

Казанда Әйләнә-тирәлекне саклау буенча IV Бөтенроссия съездына делегатлар күрсәтү конференциясе булып узды. Табигатьтән файдалану өлкәсендә күзәтчелек федераль службасы боерыгына ярашлы рәвештә Татарстан өчен билгеләнгән квота буенча, съездда республикабыздан 52 делегат катнашачак. Шулар арасында – Татарстан Экология һәм табигый байлыклар министрлыгы, Татарстан буенча Россия Табигать күзәтчелеге, Татарстан Авыл хуҗалыгы һәм азык-төлек министрлыгы, Татарстан Иҗтимагый Палатасы хезмәткәрләре, индустрия комплексының иң яхшы һәм үтемле технологияләр иңдерүче предприятиеләре җитәкчеләре һәм экологлары, муниципалитетлар вәкилләре, иҗтимагый экологик хәрәкәт активистлары, фән, мәгариф һәм табигать саклау органнары вәкилләре.

Татарстан Экология һәм табигый байлыклар министры Артем Сидоров: Россия Федерациясе Президенты тарафыннан әйләнә-тирәлекне саклау елы дип игълан ителгән бу ел ил экологлары өчен хәлиткеч булды, – дип белдерде. – Татарстанда исә, экологик иминлекне тәэмин итүдә халыкка экологик тәрбия һәм белем бирүнең хәлиткеч фактор булуын исәпкә алып, 2013 ел экологик культура һәм әйләнә-тирәлекне саклау елы буларак уздырыла.

Бу елда республикада кызыксынучы министрлыклар, тармаклар, җирле үзидарә органнары, җәмәгать оешмалары әйләнә-тирәлеккә тискәре йогынтыны киметүгә, республика халкына экологик тәрбия һәм белем бирү системасының нәтиҗәлелеген күтәрүгә юнәлтелгән зур эшләр башкаралар.

Бүген Татарстанда экологик кластер формалашкан, аның өлешләре булып торалар:

– озайлы табигать саклау чаралары үткәрүче һәм техноген йөкләнешне киметүгә шактый өлеш кертүче эре предприятиеләр;

– үз территорияләренең санитар-экологик куркынычсызлыгын тәэмин итүче муниципаль берәмлекләр;

– әйләнә-тирәлекне саклау өлкәсендәге эшчәнлекне фәнни яктан тәэмин итүче Татарстан Фәннәр Академиясе, Экология һәм җир асты байлыкларыннан файдалану проблемалары институты;

– барлык буын мәгариф оешмалары, беренче чиратта республиканың алдынгы вузлары;

– Татарстан территориясендә экологик контроль һәм күзәтчелек алып баручы федераль һәм региональ органнар;

– экологик җәмәгать оешмалары.

Артем Сидоровның әйтүенчә, бүген табигатьне саклау буенча глобаль бурычларны уңышлы үтәү һәм иң яхшы технологияләр иңдерү өчен Татарстанда бөтен кирәкле шартлар да бар. Алда торган съезд Россия Федерациясенең якын еллардагы экологик политикасын билгеләр һәм Россия субъектлары арасында тәҗрибә алмашу, ил җитәкчелеге белән бергә глобаль характердагы табигать саклау проблемаларын тикшерү, бу проблемаларны чишәрдәй көчләрне бергә туплау өчен киң мәйдан булыр.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ