Чаллыда «Юннат 2024» экологик конференциясе узды
4 нче номерлы балалар экология-биология үзәгендә кече яшьтәге мәктәп укучылары өчен «Юннат-2024» Республика фәнни-гамәли экология конференциясе узды.
Анда Чаллы, Бөгелмә һәм Алексеевск районнарыннан 60 бала катнашты. Жюри составына Кама буе идарәсеннән безнең инспектор Ләйлә Галимова да керде. Алар 45 иң яхшы тикшеренү эшен сайлап алды һәм алар буенча «Үсемлекләр экологиясе», «Хайваннар һәм су экологиясе», «Кеше экологиясе», «Кеше тормышында икенчел чимал куллану» секцияләрендә фикер алыштылар.
Экология министрлыгы белгече сөйләвенчә, егетләр жюри әгъзаларын үз эшләре белән шатландырды. Әйтик, Бөгелмә мәктәбенең 2 нче сыйныф укучысы Самат Садыйков ремонттан соң калган полипропилен торба калдыкларыннан ничек итеп гадәти булмаган яктырткычлар ясап була икәнен сөйләде. Икенчел куллануның мондый мисалы «Кеше тормышында икенчел чимал куллану» секциясендә җиңүче булды.
«Балалар кечкенәдән икенчел эшкәртү турында уйлыйлар. Яшь натуралистларны тагын берничә тапкыр экочараларда күрергә өметләнәбез», - дип билгеләп үтте Экология министрлыгы белгече Ләйлә Галимова.
Конференция ахырында барлык катнашучылар да Экология министрлыгыннан истәлекле бүләкләр алдылар.