«Юлны алга баручы үтәчәк – бу күп еллар дәвамында миңа маяк булган зирәклек». «Экология – йөзләрдә» рубрикасы герое Татьяна Васильева бүген безнең белән үзенең тормыш девизы белән уртаклаша
9 гыйнварда гидрогеология бүлеге җитәкчесе Васильева Татьяна Леонидовна үзенең туган көнен билгеләп үтте. Әлбәттә, бу көнне бик күп сүзләр һәм котлаулар булды, ә бүген без бу искиткеч хатын-кыз һәм профессионал белән сезне дә таныштырырга телибез. 1994 елда Татьяна Леонидовна, ә ул вакытта әле гади кыз бала – Татьяна, КФУның геология факультетын тәмамлый. Бәхет елмайды, практика вакытында бөтен Урал, Якутия, Красноярск краен әйләнеп чыктым, Себердә булдым, дип сөйли. «Геолог – романтик һөнәр. Чатырлар, сәяхәтләр, кыр эшләре, тикшеренүләр һәм ачышлар. Мин зур илебезнең төрле почмакларында эшли алдым, урманнар һәм күлләрнең матурлыгын күрдем, тайгага сокланып карадым», – дип сөйли безнең героиня.
Университеттан соң берничә ел «Татарстангеология» геологик экспедициясе составында Татарстанның җир асты суларын эзләү белән шөгыльләнә. Ә 2003 елда аны Татарстанның Экология министрлыгына гидрогеология һәм судан файдалануны җайга салу бүлеге башлыгы вазыйфасына эшкә чакыралар. Татьяна Леонидовна инде 20 ел безнең ведомствоның хатын-кызлар коллективын бизәп тора. Профессионализм, кешелеклелек, җаваплылык – хезмәттәшләре аны игелеклелеге һәм ярдәмчеллеге өчен бәялиләр. Ә безнең героиня тирән иманлы кеше, ул гыйбадәтханәгә йөри, ә эштән буш вакытта якшәмбе мәктәбе балалары белән дә шөгыльләнә. Оныгын ярата һәм еш кына гаиләсе белән бергә дачада ял итә, өйдәгеләрне җиләк-җимеш әзерлекләре һәм компотлар белән сыйлый. «Әлбәттә, безнең һәрберебезнең бәхет турындагы төшенчәләре төрле. Минем өчен бәхет – ул минем гаиләм, күңел гармониясе, якыннарымның күңел җылысы, шуңа күрә мин, мөгаен, бик бәхетле кешедер», – ди безнең акыллы геологыбыз, без аның белән тулысынча килешәбез. Экология министрлыгының бөтен коллективы Татьяна Леонидовнаны туган көне белән котлый һәм озын гомер тели!