Татарстанның Экология министрлыгында яшь галимнәрне бүләкләделәр
30 хезмәт һәм 9 җиңүче. Бүген Экология министрлыгында фәнни-гамәли эшләр конкурсында катнашучы яшь галимнәрне бүләкләделәр. Республиканың югары уку йортлары студентлары үз эшләрен өч номинация буенча тәкъдир иттеләр:
- табигый ресурслардан рациональ файдалану;
- табигатьне саклау технологияләрен эшләү;
- экология һәм табигатьтән файдалану өлкәсендә цифрлы чишелешләр һәм импортны алмаштыру.
Турыдан-туры яклау нәтиҗәләре буенча конкурс комиссиясе җиңүчеләрнең исемнәрен билгеләде. Аларны бүген Татарстанның экология министры Александр Шадриков бүләкләде.
«Әгәр укучы үз укытучысын уздырган икән – бу иң яхшы казаныш. Сезнең кулда – киләчәк, безнең бурыч сезгә профессионаллар булырга ярдәм итү, һәрберегездә очкын кабызу. Бүген сезнең алга таба башкаларга да идеяләр өстәү өчен шундый, үз талантларыгызны күрсәтү мөмкинлеге бар. Барысы да сездән тора. Килеп чыкмаган икән, борчылырга кирәкми, иң мөһиме – алга бару!» – дип билгеләде экология министры.
Исегезгә төшерәбез, экология буенча фәнни-гамәли эшләр конкурсы менә 4 нче ел уза. Анда Татарстан Республикасының югары уку йортлары студентлары катнаша. Конкурсның төп максаты – яшьләрне экология өлкәсендәге проблемаларны хәл итүгә җәлеп итү. Быел конкурска балалар, мәсәлән, скрининг һәм органик калдыклардан биосурфактантларны үстерү өчен оптималь мохит сайлау темасына үзләренең фәнни эзләнү эшләрен җибәрделәр. Биосурфактантлар – синтетик өске-актив матдәләргә альтернатива. Тагын бер кызыклы эш атмосфера һавасыннан углекислы газны тотып калуның нәтиҗәлелегенә һәм аны чәчү биомассасында теркәүгә багышланган иде. Бу эшләр үз номинацияләрендә беренче урыннарны алды.
«Табигый ресурслардан рациональ файдалану» номинациясе
1 урын – КФУ студенткасы Анастасия Кириченко
2 урын – КДЭУ студенткасы Анастасия Медведева
3 урын – КНИТУ-КХТИ студенткасы Елизавета Репина
«Табигать саклау технологияләрен эшләү» номинациясе
1 урын – КФУ студенткасы Юлия Павлова
2 урын – КФУ студенткасы Гөлия Сәгиева
3 урын – студентка Елена Радченко
«Экология һәм табигатьтән файдалану өлкәсендә цифрлы чишелешләр һәм импортны алмаштыру» номинациясе
1 урын – КНИТУ-КХТИ студенткасы Алевтина Шульникова
2 урын – КФУ студенткасы Эльвина Галиева
3 урын – КФУ студенты Роман Гарин
Бүген бүләкләнүчеләр арасында В.П.Лушников исемендәге Казан нефть химиясе көллияте студентлары, педагоглары һәм коллективы да бар иде. Балаларга Россия экология җәмгыятенең Татарстан бүлегеннән «ESG- проектлар белән идарә итү һәм оештыру» компетенциясе буенча югары технологияләр чемпионатында икенче урын өчен рәхмәт хатлары тапшырылды. Чемпионат һөнәри осталык буенча Бөтенроссия чемпионат хәрәкәте кысаларында узды.