Татарстанның Иделне савыктыру тәҗрибәсен Президент Владимир Путин кушуы буенча формалаштырыла торган яңа федераль проектта исәпкә алачаклар
Бүген Казанда Россия вице-премьеры Виктория Абрамченко кушуы буенча су объектларын сәламәтләндерү һәм саклау мәсьәләләре буенча семинар-киңәшмә үз эшен башлады.
Бүген Казанда «ИТ-парк» югары технологияләр өлкәсендәге технопаркта старт алган семинарда Россия табигать ресурслары һәм экология министры урынбасары Павел Барышев, Россия төзелеш һәм ТКХ министры урынбасары Алексей Ересько, төбәкләрнең табигать ресурслары һәм экология министрлыклары, шулай ук төзелеш һәм ТКХ министрлыклары, су каналлары һәм подрядчы оешмалар башлыклары катнаша.
Сессияләрнең модераторы булып Елена Довлатова – Россия Су белән тәэмин итү һәм су чыгару ассоциациясенең башкарма директоры тора.
Семинар-киңәшмә программасы ике көнне күздә тота, аларның беренчесе Россия төбәкләрендә «Иделне савыктыру» федераль проектын тикшерүгә багышланды, ә икенчесе – биологик чистарту корылмаларының ләм кырларына һәм Казан шәһәренең агынты суларны термомеханик эшкәртү цехына баруга багышланды.
Исегезгә төшерәбез, сентябрьдә Татарстанга эш сәфәре кысаларында Россия Хөкүмәте Рәисе урынбасары Виктория Абрамченко Казанның ләм кырларында һәм биологик чистарту корылмаларында булды һәм су объектларын савыктыру проблемаларын хәл итүдә мондый комплекслы алым һәм алдынгы тәҗрибәне бөтен ил буенча таратырга кирәклеген билгеләп үтте.
Нәтиҗәләр буенча семинар-киңәшмә үткәрергә карар ителде, аның төп темасы «Иделне савыктыру» федераль проектын тормышка ашыру нәтиҗәләре, агынты суларны чистарту мәсьәләләре, шулай ук чистарту корылмаларын проектлау, төзү һәм эксплуатацияләү торачак.