Министр урынбасары Ольга Манидичева КНИТУ-КАИ студентлары белән очрашты һәм ведомство эше турында сөйләде
Бүген Татарстан Республикасы Экология һәм табигать ресурслары министрлыгында «А.Н.Туполев исемендәге Казан милли тикшеренү техник университеты – КАИ» (КНИТУ-КАИ) Сәнәгать һәм экологик куркынычсызлык кафедрасы һәм гомуми химия һәм экология кафедрасы студентлары өчен экскурсия узды. Ведомство белгечләре студентларга атмосфера һавасының пычрануын контрольдә тотучы автомат станция, күчмә экологик лаборатория эшен күрсәттеләр һәм аның эш принциплары турында сөйләделәр. Министрлык хезмәтендә барлыгы 17 атмосфера һавасын контрольдә тотучы автомат станция бар, шуларның 5се Татарстан башкаласында урнашкан.
Балалар белән экология министры урынбасары Ольга Манидичева һәм Министрлыкның бүлек башлыклары очрашты. Алар студентларга экологик мониторингның нәрсә икәнен һәм аның ничек башкарылуын, ни өчен уңайсыз метеорологик шартларда һава сыйфатын катгый контрольдә тоту һәм нинди матдәләр буенча һава һәм суны анализлау аеруча мөһим булуын сөйләделәр. Ольга Манидичева шулай ук кунакларга Министрлык конкурслары турында сөйләде һәм балаларга экология буенча фәнни-гамәли эшләр конкурсында катнашырга тәкъдим итте. Конкурска гаризалар кабул итү вакыты 10 ноябрьгә кадәр озайтылды.
«Бүген сез бик күп һәм бу сөендерми кала алмый. Димәк, сез экология белән кызыксынасыз, димәк сез безгә булышасыз һәм сез экологик юнәлешле. Бүген без сезнең белән сөйләшкән һәр нәрсә, экологик мониторингның теләсә нинди темасы сезнең диплом, курс яки конкурс эшегезнең нигезенә салынырга мөмкин. Без сезнең әйләнә-тирә мохитне саклау һәм табигатьтән файдалануны камилләштерү буенча тәкъдимнәрегезне көтәбез», – дип билгеләп үтте министр урынбасары.
Очрашу ахырында белгечләр студентларны кызыксындырган барлык сорауларга җавап бирделәр һәм аларны Министрлыкка практикага чакырдылар. Бәлки бүгенге кунакларның берсе киләчәктә ведомствоның зур коллективының бер өлеше булырга теләр һәм Министрлыкка экскурсиягә түгел, ә эшкә килер!