ТР Экология министрлыгы хезмәткәрләре Казан балаларына «Бумбатл»ның нәрсә икәне турында сөйләде
ТР Экология министрлыгының экологик белем бирү бүлеге белгечләре Казан шәһәренең 96 нчы гимназиясендә һәм 326 нчы балалар бакчасында экологик дәресләр үткәрде. Алар балаларга чүп-чарны аерым җыюның мөһимлеге турында сөйләделәр һәм калдыкларның ничек эшкәртелүе турында видео күрсәттеләр. «Экология министрлыгы тарафыннан чүп-чарны аерым җыюны пропагандалаучы берничә конкурс һәм акция үткәрелә. Балалар бакчасында тәрбияләнүчеләрнең, мәктәп укучыларының, студентларның һәм, гомумән, республикабызның күпчелек халкы әйләнә-тирә мохиткә битараф түгел һәм экоакцияләрдә актив катнаша. Табигатькә теләсә кайсы секундта ярдәм итәргә әзер булган яшь экоактивистлар сафындагы балаларны күрүебезгә шат булырбыз!» – дип билгеләп үтте ТР Экология министрлыгының экологик белем бирү һәм иҗтимагый оешмалар белән хезмәттәшлек бүлегенең әйдәп баручы белгече Анастасия Мердюкова.
Экологик очрашу макулатура җыю буенча «Бумбатл» Бөтенроссия акциясенә ярдәм итү максатыннан узды.
Исегезгә төшерик, «БумБатл» – кәгазьне эшкәртүгә тапшырып, табигать турында кайгырту мөмкинлеге. Ләкин, теләсә кайсы батл кебек үк, ул шулай ук җыелган макулатура саны буенча ярышлар да булып тора, аларда команда яки шәхси зачетта беренчелек өчен көрәшергә мөмкин. Акция 10 октябрьдән 15 ноябрьгә кадәр «Экология» илкүләм проектына ярдәм итү өчен уза. Татарстан Россиянең топ-10 төбәгенә керде. Ике ай эчендә #БумБатл бөтенроссия акциясендә катнашучы татарстанлылар 63,4 тонна макулатура җыеп, аны эшкәртүгә тапшырдылар.