Чаллының «Калейдоскоп» балалар бакчасы балаларын экологлар рәтенә кабул иттеләр
Чаллы шәһәренең 130 нчы «Калейдоскоп» балалар бакчасында урта төркем балаларын нәни экологларга багышлау булды. Эколятлар – табигатьнең дуслары һәм аны саклаучылар, әйләнә-тирә мохитне яратучы, саклаучы балалар. Ел дәвамында балалар өмәләрдә катнашачак, батареялар, икенчел чимал һәм макулатура тапшырачаклар һәм ТР Экология министрлыгы конкурсларында катнашачаклар. Тантанада ТР Экология министрлыгының Кама яны территориаль идарәсе инспекторы катнашты. Балалар инспекторга экология өлкәсендәге белемнәрен күрсәттеләр, табигатьтә үз-үзләрен тоту кагыйдәләре турында сөйләделәр, эколятлар әкият геройлары һәм табигатьне саклаучы образларында булган күренешләрне күрсәттеләр.
Инспектор Ләйлә Галимова балаларга ни өчен аерым чүп җыю кирәклеге турында сөйләде. Очрашу ахырында балалар эколят анты бирделәр һәм «Эколят» эмблемалары белән значоклар, шулай ук ТР Экология министрлыгы бүләкләрен алдылар.