Казанның ләм кырларын рекультивацияләү буенча Татарстанның алдынгы тәҗрибәсен бөтен Россия буенча таратырга кирәк
Бу хакта үзенең визиты барышында Россия Федерациясе Хөкүмәте Рәисе урынбасары Виктория Абрамченко белдерде. Ул билгеләп үткәнчә, «Экология» илкүләм проектының «Иделне савыктыру» кысаларында гамәлгә ашырыла торган Татарстанның сынау проектларын бөтен ил буенча таратырга мөмкин.
Исегезгә төшерәбез, бүген Татарстанга эш визиты белән Россия вице-премьеры Виктория Абрамченко килде. Ул Казанның биологик чистарту корылмаларын һәм ләм кырларын карап чыкты инде. Рөстәм Миңнеханов рәислегендә Россия вице-премьеры биологик чистарту корылмаларында башкарылган эшләр белән танышты. Виктория Абрамченко 2023 елда нинди эшләр планлаштырылуы турында сөйләде.
Биологик чистарту корылмаларын масштаблы реконструкцияләү шәһәр агынтыларын чистарту сыйфатын яхшыртырга мөмкинлек бирәчәк.
Ләм басуларын рекультивацияләү буенча сынау проекты кысаларындагы эшләр турында вице-премьерга экология министры Александр Шадриков хәбәр итте. Ул эшләрнең «Экология» илкүләм проектының «Иделне савыктыру» федераль проекты кысаларында алып барылуы турында сөйләде. Алар 2021 елның ноябрендә, алданрак башланган. Заказчы булып ТР Төп инвестиция-төзелеш идарәсе тора. Генераль подрядчы – «Ядран-Строй» ҖЧҖ. Экология министры билгеләп үткәнчә, ярты гасырдан да кимрәк булмаган ләм кырлары якындагы авылларда яшәүчеләрнең генә түгел, барлык Казанлыларның да тормыш сыйфатына тәэсир иткән. Объект күптән инде үзенең проект куәтен туздырган, кайбер участоклар 8,5 метр тирәнлеккә җиткән, ә Куйбышев сусаклагычының якынлыгын исәпкә алсак, бу елга өчен куркыныч булырга мөмкин. 2019 елдан Татарстан Республикасы Экология һәм табигать ресурслары министрлыгы Рәис Рөстәм Миңнеханов кушуы буенча ләм басуларын рекультивацияләү проекты өчен технологияләр сайлап алу белән шөгыльләнде. Ләм кырларын рекультивацияләү буенча тәкъдим ителгән 30дан артык технологиядән геотубировка ысулы сайланган – бүгенге көндә иң актуальләрнең берсе. Рекультивация проекты сынау проекты булып тора.
Виктория Абрамченко бу юнәлештә Татарстан тәҗрибәсен югары бәяләде. «Мин Казанга биологик чистарту корылмаларын алдынгы тәҗрибә үрнәге буларак карарга килдем һәм, чыннан да, канәгать калдым. Безнең илдә барлык чистарту корылмалары шактый тузган хәлдә, тузганлык 60-70% тәшкил итә, чөнки алар совет чорында ук төзелгән», —диде ул.
Казанда биологик чистарту корылмалары эшенең нәтиҗәлелегенә Иделнең иминлеге бәйле, дип билгеләп үтте вице-премьер.
Виктория Абрамченко бу проектның ни өчен алдынгы дип саналуын аңлатты. «Без бүген барган гигант полигон, иске ләм утырмалары белән, катлаулы, чынлыкта пионер технологиясе ярдәмендә рекультивацияләнә һәм Идел елгасы өчен бернинди дә куркыныч тудырмаячак. Проект график буенча 2024 ел ахырында тәмамлана», — дип өстәде спикер.
Шулай ук Россия вице-премьеры Татарстанның алдынгы тәҗрибәсен алга таба, ил буенча тиражларга кирәклеген дә билгеләп үтте. «Без бүген республика башлыгы белән бу алдынгы тәҗрибәне ил буенча тарату турында сөйләштек. Мөгаен, безгә Казанда Россия Федерациясендә су чистарту системасы белән идарә итү органнары өчен семинарлар сериясен үткәрергә туры килер. Бу тәҗрибәне күрсәтергә һәм тиражларга кирәк», — дип ассызыклады спикер.