Татарстанлылар «Утильләштерү мәктәбе: электроника» проекты кысаларында 100 тонна электролом калдыкларын тапшырган
Бер ел эчендә программа республиканың 19 торак пунктын үз эченә алган, бу – зур шәһәрләр дә, кечкенә районнар да. Республика халкы һәм бюджет оешмалары 100 тоннага якын электролом җыйган һәм аны Мордовиядәге махсуслаштырылган экологик комбинатка эшкәртүгә җибәргән. Республикада электролом җыюлар даими үткәрелә. Әйтик, май һәм июнь айларында Казанда, Буада, Питрәчтә һәм Зеленодольскида, июльдә Казанда, Чаллыда һәм Кама Тамагында җыю эшләре узган. Июль аенда гына да бюджет учреждениеләре һәм оешмалары 13 тоннадан артык калдык тапшырган. Халык та актив кушыла, аларга уңайлы булсын өчен махсус машиналар районнарга һәм авылларга килә.
Киләсе җыю эше 20-21 июльдә узачак. Чара Биектау, Әтнә районы, шулай ук Казан, Буа һәм Апас авылларының бюджет оешмалары өчен оештырылачак.
Исегезгә төшерәбез, ТР Экология һәм табигать ресурслары министрлыгы белән табигатьтән рациональ файдалану фонды арасында былтыр килешү имзаланган иде. Проектның төп максаты – халыкка үз срогын үтәгән техниканы экологик һәм уңайлы итеп эшкәртүгә тапшыру мөмкинлеген бирү, шулай ук үсеп килүче буынның экологик белем алуына һәм мәгърифәтенә ярдәм итү. Бу ел башында әлеге федераль экологик программага йомгак ясалды, анда Татарстан «Утильләштерү мәктәбе: электроника» программасының иң яхшы старты һәм яктыртылышы» номинациясендә җиңүче булды.