Ваемсыз булмаган халык Татарстан районнарында тәртип урнаштыруны дәвам итә
Санитар-экологик икеайлык кысаларында безнең экологлар һәм битараф булмаган татарстанлылар табигатьне саклау акцияләрендә актив катнашалар һәм республика районнарында тәртип урнаштыруны дәвам итәләр.
Экология министрлыгының Идел-Кама территориаль идарәсе белгечләре Аграр колледж студентлары белән бергә Алексеевск районында Кама елгасы ярын чистарттылар һәм Чистай шәһәренең пристань урманында өмә үткәрделәр. Гомумән алганда, 20 куб. м. калдык чыгарылган. Ә Идел аръягы территориаль идарәсе экологлары «Буа шикәре» ҖЧҖ хезмәткәрләре белән бергә Казан-Ульяновск трассасы буйлап урман полосасын җыештыруга чыктылар һәм агачларын агарттылар. Ютазы районында өмәләрдә 1410 кеше катнашты, уртак көч белән 294 куб.м. чүп-чар җыелды. Менделеевск районында Кама буе территориаль идарәсе белгечләре, оешма һәм предприятие хезмәткәрләре беркетелгән территорияләрдә тәртип урнаштырдылар.
Сез дә кушылыгыз! Шимбә көннәрендә өмәдә катнашыгыз һәм шәһәрне чистарак итегез!