Арча балалар бакчасында Экология министрлыгы инспекторлары катнашында семинар узды
Арча балалар бакчасында «Мәктәпкәчә яшьтәге балаларга экологик белем бирү. Дөньякүләм күзаллауны үстерү һәм тәҗрибә-тикшеренү эшчәнлеге» темасына экология буенча төбәк семинары үтте. Чарада ТР Экология министрлыгының Төньяк территориаль идарәсе инспекторлары катнашты.
Семинарның практик өлешендә балалар «Без шәһәрнең чисталыгы өчен» проектын якладылар, кунаклар өчен «Күлгә сәяхәт» театральләштерелгән чыгышын әзерләделәр һәм әти-әниләре белән бергә икенчел чималдан ясаган киемнәрен күрсәттеләр. Шулай ук семинар кысаларында Министрлык экологлары «Безнең белән бүлеш» дигән экодәрес үткәрделәр, анда яшь экологлар чүп-чарны аерым җыю һәм эшкәртүнең мөһимлеген белделәр.
Семинарның теоретик өлеше Кукмара, Арча, Балтач районнары, Казан һәм Киров өлкәсенең Вятские Поляны мәктәпкәчә учреждениеләре педагогларының чыгышларына һәм презентацияләренә багышланган иде. Экология министрлыгы инспекторы Гөлина Мөхәммәтшина балаларда экологик культураны ничек формалаштыру турында белемнәре белән уртаклашты, аерым алганда, ул табигатьтә экодәресләр турында сөйләде.
Актив катнашулары өчен барлык балалар да әйләнә-тирә мохит турында махсус буяу китаплары алдылар.