Изумрудное күлендәге суның нәтиҗәләре әзер
Исегезгә төшерәбез, министрлыкка Изумрудное күлендәге бозның табигый булмаган төскә (ачык алсу) ия булуы турында шикаять килде. Үзәк территориаль идарә инспекторлары һәм Экология министрлыгы лабораториясе белгечләре Казанның Киров районына чыктылар.
Лаборатория белгечләре 3 урында су һәм 2 урында боз пробаларын алганнар. Шулай ук тикшерү барышында экологлар күлдә алсу буяу белән күп кенә петард калдыклары тапканнар, нәкъ менә төсле төтен шашкаларын куллану бозның төсен үзгәртүгә сәбәп булырга мөмкин.
Су һәм боз пробаларын анализлау нәтиҗәләре буенча, пычратучы матдәләрнең рөхсәт ителгән чик концентрациясеннән артуы ачыкланмаган.
Экология министрлыгы барлык халыктан су объектларына сакчыл карауларын сорый. Пиротехника әйберләрдә төрле химик матдәләрнең вак кисәкчәләре бар. Җиргә төшкәч, алар туфракка җиңел үтеп керә, шулай ук суны пычрата ала. Моннан тыш, үпкәләргә кечкенә пластик кисәкчәләр белән бергә сиздермичә эләгеп, төтен кеше сәламәтлегенә зыян китерә.
Фейерверк һәм шарларга альтернатива бик күп. Төрле флешмоблар, агачларны коллектив утырту, территорияләрне төзекләндерүдә катнашу аларны җиңел алыштырачак.