Казанда суга багышланган акция кысаларында ТР Экология министрлыгы хезмәткәрләре экологик дәрес уздырды
Бөтендөнья Су ресурслары көнендә Казанда «Кольцо» сәүдә-күңел ачу комплексында суга багышланган экологик-агарту акциясе узды. Экоакция кысаларында сәүдә-күңел ачу комплексында ТР Экология министрлыгы белгечләре ачык экодәрес үткәрделәр, анда катнашучыларга ни өчен су ресурсларын саклау мөһим икәнлеге турында сөйләделәр, су сыйфаты күрсәткечләрен билгеләү буенча тәҗрибәләр күрсәттеләр һәм истәлекле бүләкләр бүләк иттеләр.
«Ел саен 22 мартта Бөтендөнья су ресурсларын саклау көне билгеләп үтелә. Бу бәйрәм хөрмәтенә Росводресурслар белән берлектә Казанда «С водой на ты» акциясе уза. 93 нче мәктәпнең 7 нче сыйныф укучылары өчен махсус экология министрлыгы лабораториясе хезмәткәрләре аммоний ионнары, нитритлар һәм фосфатларга сыйфатлы су анализы үткәргәннәр. Анализ өчен су Ашыт елгасыннан алынды», - дип сөйләде ТР Экология министрлыгының экологик агарту һәм иҗтимагый оешмалар белән хезмәттәшлек бүлеге башлыгы Ольга Артемьева.
Шулай ук чара кысаларында халык үзләренең «су эзе»н таныды. VK Mini Apps платформасындагы «Су эзе калькуляторы» мини-кушымтасы ярдәмендә VK кулланучылары онлайн-тест узды, үзләренең яшәү рәвешләрен анализладылар, көндәлек су чыгымнарын исәпләделәр, шулай ук экологик лайфхаклар белән таныштылар.
«С водой на ты» экологик-агарту акциясе шулай ук Россия Федерациясенең 4 шәһәрендә (Мәскәү, Санкт-Петербург, Түбән Новгород, Екатеринбург) иң күп кеше йөргән сәүдә-күңел ачу комплекслары һәм бизнес-үзәкләр мәйданчыкларында узды. Чараның төп максаты - халыкны су ресурсларын саклау һәм рациональ куллану мәсьәләләрен хәл итүгә җәлеп итү. Чараны Су ресурслары федераль агентлыгы (Росводресурсы) оештыра.