«Системалы эш үз нәтиҗәсен бирде». Татарстан ESG-критерийлары буенча топ-5 төбәккә керде
Быел ESG критерийларына ярашлы рәвештә топ-5 регионга Мәскәү, Татарстан, Төмән, Белгород өлкәләре һәм Санкт-Петербург керде.
Бәяләү өчен 45 күрсәткеч кулланылган, белгечләр экологик, социаль һәм идарә сәясәтенең сыйфатын бәяләгән. Төбәкләр ESG критерийларына туры килү дәрәҗәсе буенча биш төркемгә бүлделәр һәм 0 дән 1 баллга кадәр бәяләделәр.
Иң югары «алдынгы» дәрәҗә 19 төбәккә бирелгән. Рейтингны Мәскәү (0,781 балл) җитәкләде, ул зур икътисади ресурсларга ия һәм халыкара һәм милли дәрәҗәдә тотрыклы үсеш өлкәсендә масштаблы эш алып бара. Аеруча алга киткән экологик юнәлеш белән аерылып торган Татарстан (0,769 балл) икенче булды. Топ-5кә шулай ук Төмән (0,723) һәм Белгород өлкәләре (0,702) һәм Санкт-Петербург (0,683) кергән.
Шуны да билгеләп үтәргә кирәк, Татарстан Республикасы экологик күрсәткеч буенча 1 нче урынны алды, ул ESG тәртибен төбәк эшчәнлегенә кертүнең өч мөһим аспектына кагыла: әйләнә-тирә мохиткә йогынты, климат үзгәреше һәм ресурслардан файдалану.
«Бу очраклы түгел. Хакимият, фән, бизнес һәм җәмгыятьнең системалы, консолидацияләнгән эше үз нәтиҗәсен бирде. Соңгы елларда Татарстанда тулай төбәк продукты чагыштырма бәяләрдә 2,6 тапкыр артты, шул ук вакытта чыгарып ташлаулар күләме 21,4% ка кимеде», - ди ТР экология министры урынбасары Ольга Манидичева. Ул шулай ук «Экология» илкүләм проектының да моңа этәргеч бирүен билгеләп үтте. Татарстанда әйләнә-тирәлекнең сыйфат күрсәткечләренә йогынты ясый торган бик күп чаралар тормышка ашырыла.