Бүген экология министры Александр Шадриков «Табигатьтән файдалану һәм бөтендөнья табигый мирасын саклау» конференциясендә чыгыш ясады
Ул Санкт-Петербургта Бөтендөнья мәдәни һәм табигый мирасны саклау конвенциясенең 50 еллыгына багышланган Халыкара форум кысаларында уза.
Экология министры форумда катнашучыларны Татарстан Президенты исеменнән сәламләде һәм җир асты байлыкларыннан файдалану һәм табигатьтән файдалануның башка өлкәләрендә мәнфәгатьләрне дәүләти җайга салу өлешендә инициативалар белән чыгыш ясады. Аерым алганда, Александр Шадриков хәзерге вакытта су объектларын куллану һәм аларның торышы балансына аерым игътибар кирәклегенә басым ясады. Елгалардагы су дәрәҗәсенең сизелерлек үзгәрүе җир асты һәм җир өсте суларының экологик торышына тискәре йогынты ясый, ә алар халыкны эчә торган су белән тәэмин итү чыганагы булып тора.
Хәзерге заман вәзгыяте һәм су объектларына тискәре йогынтыны киметү ихтыяҗы эчә торган су белән тәэмин иткәндә халыкның экологик куркынычсызлыгына юнәлтелгән фәнни - нигезле алымны бергә эшләү өчен хезмәттәшлекне көчәйтүне таләп итә. Киләчәктә проблеманы чишүнең бер варианты – махсус гидротехник корылма-су депозитарийларын булдыру. Алар су басу вакытында су тупларга да, дефицит булганда су запасы белән тәэмин итәргә мөмкинлек бирәчәк.
Экология министры сүзләренә караганда, цифрлаштыру мәсьәләләренә, шул исәптән җир асты байлыкларыннан файдалану өлкәсенә дә игътибар бирергә кирәк. Табигатьтән файдалану өлкәсендә цифрлы трансформацияне үстерү һәм тормышка ашыру, эшкәртелә торган платформалар һәм программалар ведомствоара хезмәттәшлек күләмен һәм кеше факторына бәйле хаталар санын киметергә мөмкинлек бирәчәк.
Әйтик, республикада «Җир асты байлыклары» бердәм дәүләт автоматлаштырылган мәгълүмат системасы эшләнә.
Бу проект, шул исәптән, «Җир асты байлыклары» бердәм дәүләт автоматлаштырылган мәгълүмат системасында теркәлгән товар-транспорт накладнойлары тарафыннан чималны маркировкалау аша законсыз чыгарыла торган файдалы казылмалар күләмен киметергә мөмкинлек бирәчәк.
Моннан тыш, климат үзгәрү проблемасы һәм аз углеродлы үсеш сәясәтен тормышка ашыруның мөһимлеге, шулай ук биологик төрлелекне, иң беренче чиратта, планетаның сирәк һәм куркыныч астында булган төрләрен саклау мәсьәләләре кузгатылды.