Экологлар Куйбышев сусаклагычының су сыйфатын тикшерәчәк

Бүген Татарстан Экология һәм табигый байлыклар министрлыгының Үзәк махсуслашкан аналитик контроль инспекциясе (ЦСИАК) хезмәткәрләре үзендә “Волга-М” табигать саклау комплексы булган “Фламинго” экоаналитик контроль патруль судносында Идел буйлап экспедициягә юнәлә. “Казан – Чистай” маршруты чама белән 7 көн дәвам итәчәк.
“Фламинго” экоаналитик судносы Куйбышев сусаклагычы акваторияләрендәге пычрату чыганакларын контрольдә тотуга исәпләнгән. “Волга-М” комплексы суның төп физик-химик параметрларын (температураны, чагыштырма электр үткәрүчәнлекне, минераллашу кимәлен, суда кислород һәм водород ионнары концентрациясен, окисльлашу-кайтарылу потенциалын) ике тирәнлектә өзлексез үлчи торган батырмалы датчиклар системасы белән җиһазланган. Бер үк вакытта су борттагы экспресс химик анализ приборларына өзлексез ала барыла, аларда исә агымлы һәм агымлы-инжекторлы анализаторлар ярдәмендә судагы пычраткыч матдәләр (нефть продуктлары, нитрат-, нитрит-, фосфат-, фторид-, хлорид-, аммоний-, бакыр һ.б. ионнары) концентрациясе өзлексез билгеләнә. Техника 12 параметр буенча анализ нәтиҗәләре алырга сәләтле. “Дон” аппараты белән су өстендәге нефть продуктларын дистанцион табу башкарыла, ультратавышлы зондлау системасы белән су төбе тикшерелә һәм суның пычранган катламнары, чит-ят катнашмалар ачыклана. Җентеклерәк анализ исә Татарстан Экология һәм табигый байлыклар министрлыгының ЦСИАК лабораториясендә үткәрелә.
Татарстан Экология һәм табигый байлыклар министрлыгының Үзәк махсуслашкан аналитик контроль инспекциясе хезмәткәрләре Татарстанның 4 иң эре елгасында: Иделдә, Камада, Нократта һәм Агыйделдә су күзәтчелеген даими тәртиптә үткәреп торалар.