Универсиада уты Ульяновскида

11 июньдә XXVII Бөтендөнья җәйге студент уеннары Уты Россиядәге Ут Эстафетасы маршрутындагы чираттагы шәһәргә – Ульяновскига килеп җитте. Монда Универсиада символын хөрмәтләп икмәк-тоз һәм татар милли ашамлыгы чәкчәк белән, дәртле барабан ритмнары астында каршы алдылар.
Ульяновскидагы Ут Эстафетасы тантанасында Татарстан Экология һәм табигый байлыклар министры Артем Сидоров та катнашты. “Универсиада Уты планетабызның биш континентында булды инде, менә хәзер ул Россия буйлап сәяхәт итә. Мин бүген Универсиаданың төп символын Идел буеның йөрәге – Ульяновски каршы алганга шатмын, – дип белдерде ул. – Ульяновск илебезнең иң динамик үсешле шәһәрләреннән берсе булып тора. Моны спорт корылмаларының, шулай ук уку йортларының һәм мәктәпләрнең күп булуы исбатлый, монда яшьләр политикасы үсеш кичерә, спорт белән шөгыльләнү популярлаша бара. Ульяновскиның Россия җыелма командасы составында чыгыш ясаячак вәкилләренә җиңүләр телим!”
Ульяновск Россиядә Универсиада Уты Эстафетасының егерме дүртенче шәһәре булды. Утны Ульяновск өлкәсе башкаласы урамнары буйлап регионның иң яхшы студентлары, хөкүмәт әгъзалары, танылган спортчылар йөртте, алар арасында грек-рим көрәше буенча атказанган спорт мастеры, Сурдолимпия уеннары чемпионы, Россия чемпионы Евгений Голованов, кикбоксинг буенча дөнья чемпионы, Дөнья кубогы иясе Андрей Ховрин, волонтерлар, яшьләр оешмалары һәм Универсиаданың партнерлык компанияләре вәкилләре бар иде. Эстафетаны ачу мәртәбәсе Россия Федерациясенең физик культура һәм спорт буенча мактаулы хезмәткәре, Таҗикстан ССРның атказанган тренеры, Өстәл теннисы буенча Россия студентлар лигасы президенты Владимир Буяновка бирелде. Ульяновскида Бөтендөнья студент уеннарының төп символын барлыгы 50 факелчы йөртте. Эстафетаның югары ноктасы буларак шәһәрдәге Ут кәсәсе кабызылды.