Яр ныгыту корылмасы ачылды

Бүген Балык Бистәсендә, Куйбышев сусаклагычының уң ягында яр ныгыту корылмасын ачу тантанасы үткәрелде. Район халкын Татарстан Экология һәм табигый байлыклар министры Артем Сидоров сәламләде. Үз чыгышында ул, ярларны ныгыту Татарстан өчен кискен мәсьәлә булып тора, дип белдерде. – Чөнки республикабыз Россия Федерациясенең Идел-Кама бассейнында урнашкан иң күп сулы субъекты булып тора, бездә су өслекләре тулай мәйданның 7% чамасын били. Мондагы зур елгалар тотрыклы һәм өзлексез су чыганагы да, шул ук вакытта яр буе зонасына тискәре йогынты ясаучы да булып торалар. Су объектларының актив йогынты зонасында Татарстанның 14 муниципаль районы урнашкан. Ышанычлы яр ныгыту корылмалары исә Балык Бистәсендә һәм Мамадышта бар. Алар Татарстан Республикасы Президенты Рөстәм Нургали улы Миңнехановның ярдәме белән барлыкка килде, – дип ассызыклады министр. – Балык Бистәсендә яшәүчеләр, матур җирләргә йөрергә яратучы бөтен республика халкы кебек үк, искиткеч матур яр корылмасына тиенделәр, алга таба ул районның визит карточкасына, Балык Бистәсенең кунакчыллык зонасына әверелер.
Балык Бистәсе муниципаль районы башлыгы Илһам Вәлиев Татарстан Хөкүмәтенә, Экология һәм табигый байлыклар министрлыгына башкарган эшләре өчен рәхмәт белдерде.
Тантаналы чара Халыкара Әйләнә-тирәлекне яклау көнендә үткәрелде, бәйрәм концерты, елга буйлап катерларда йөзүләр белән үрелеп барды.