Татарстан Республикасы Экология һәм табигать ресурслары министрлыгы

Татарстанда калдыклар белән эш итүдә 2 меңнән артык кагыйдә бозу очрагы кисәтелгән

2013 елның 6 мае, дүшәмбе

Республиканың муниципаль районнарында 27 апрель көнне үткән өмәдә 232 меңнән артык кеше катнашкан. Эшләргә 1.5 меңнән артык техника берәмлеге җәлеп ителгән, каты көнкүреш калдыклары полигоннарына 123 мең куб.м калдык озатылган, 19 меңнән артык агач һәм куак утыртылган. Бүген ТР Хөкүмәт Йортында узган атналык киңәшмәдә Татарстан экология һәм табигый байлыклар министры Артем Сидоров шундый белешмәләрне атады. Киңәшмәне ТР Президенты Рөстәм Миңнеханов алып барды, анда шулай ук ТР Премьер-министры Илдар Халиков катнашты.

Казанда узган гомумшәһәр өмәсенә килгәндә, икеайлык башыннан бирле шәһәрне җыештыру чараларында 139 меңнән артык кеше катнашкан. Икеайлык чорында һәм шимбә өмәсендә шәһәр полигоннарына 122 мең кубометрдан артык төрле калдыклар чыгарылган, шул исәптән өмә көнне – 7.5 мең кубометр. Урам юллары һәм тротуарлар җыештырылган, ишегаллары тәртипкә китерелгән, парклар, бакчалар һәм скверлар чүп-чардан чистартылган. 4 мең 600 агач һәм 8 мең 878 куак утыртылган.

Тулаем республика буенча калдыклар белән эш итү кагыйдәләрен бозуның 2487 очрагы кисәтелгән. Ачыкланган бозулар буенча 849 беркетмә төзелгән, барлыгы 3 млн 937 мең 400 сумлык штрафлар салынган. 19 материал чара күрү өчен прокуратура органнарына тапшырылган.

Икеайлык башыннан алып 396 мең 706 кв.м мәйданлы 620 рөхсәтсез калдыклар ташлау урыны ачыкланган.

Казанда, шәһәр администрациясе белән берлектә, калдыклар белән эш итү кагыйдәләрен бозуның 1886 очрагы ачыкланган, шулар буенча 516 административ материал төзелгән.

Рөстәм Миңнеханов бозучылар белән катырак эш итәргә, калдыклар күп була торган индустрия предприятиеләре, төзелеш комплекслары территорияләрен игътибар белән тикшерергә кирәк, дип белдерде.

“Без Кытайда булган идек, аларда төзелеш вакытында урманнар челтәр белән каплана – һәм бернинди чүп-чар юк. Ә бездә төзелешне табуы җиңел – тирә-ягы чүп-чар була. Культура булырга тиеш. Казанда моның буенча каты эш алып барырга кирәк, безгә бөтен дөнья киләчәк. Лаеш районындагы, шәһәр тирәсендәге хәлләрне күзәтеп торырга, тимер юл тармагын күзәтергә кирәк, урманлыклар да рәешле хәлдә булырга тиеш. Чүп-чар күп чыгарыла. Даими бозучылар булса – материалларын прокуратурага тапшырыгыз”, – дип нәтиҗә ясады ТР Президенты.

Татар-информ материаллары буенча.

БАРЛЫК ЯҢАЛЫКЛАРНЫ УКУ