Татарстан Республикасы Экология һәм табигать ресурслары министрлыгы

Халыкара су ресурслары көне

2013 елның 28 марты, пәнҗешәмбе

Экологик культура һәм әйләнә-тирәлекне саклау елы кысаларында Татарстанның мәгариф оешмаларында Халыкара су ресурслары көненә туры китереп “Бердәм экологик дәрес” акциясе үткәрелде.

Акция Татарстан Экология һәм табигый байлыклар министрлыгы, Татарстан Мәгариф һәм фән министрлыгы, Су ресурслары федераль агентлыгының Түбән Идел бассейны сулыклары идарәсенең Татарстан буенча бүлеге һәм “Рус география җәмгыяте” бөтенроссия җәмәгать оешмасының региональ бүлекчәсе тарафыннан оештырылды.

Тулаем республика буенча “Бердәм экологик дәрес” 200дән артык мәгариф оешмасында үткәрелде.

Казан шәһәренең Вахитов районындагы 5нче лицейда дәресне Татарстан Экология һәм табигый байлыклар министрлыгының информация-анализ идарәсенең башкаручы киңәшчесе Елена Гыйлмеҗанова үткәрде. 1-4нче класс укучылары, яшь эколог мәктәбе тыңлаучылары мәдәни-агарту тамашасы әзерләгәннәр иде. Дәрес әңгәмә рәвешендә узды. Туган якның су ресурсларын саклауга зур игътибар бирелде. Укучылар республиканың су объектларын саклауга һәм яклауга юнәлтелгән үз экологик проектларын һәм идеяләрен күрсәттеләр, су турындагы концерт программасы белән чыгыш ясадылар.

Яшь экологлар янында кунакта “Рус география җәмгыяте” бөтенроссия җәмәгать оешмасының Татарстан бүлекчәсе җитәкчесе урынбасары, тикшерүче-водолаз, Татарстанның Су асты спорты төрләре федерациясе инструкторы, профессиональ коткаручы Андрей Филлипов та булып китте. Ул балаларга Рус география җәмгыятенең тикшеренүләре, атап әйткәндә, күптән түгел булган экспедиция – дөньяның иң салкын сулыкларының берсе – Якутиянең аз өйрәнелгән һәм ерак урнашкан Лабынкыр күле төбенә төшү турында сөйләде. Бу экспедициядә катнашучылар 50 метр тирәнлеккә максималь түбән температурада төшеп рекорд куйганнар. Коткаручының әйтүенчә, экспедициянең төп максаты булып Лабынкырның төбен, флорасын һәм фаунасын өйрәнү, шулай ук мәңге туңлык шартларындагы гидросистеманы өйрәнү торган.

Акциядә кече бизнес вәкилләре дә катнашты. “Сестрица” дип аталган эчә торган су җитештерү белән шөгыльләнүче “Сәламәт яшәү” компаниясе, дәрес йомгаклары буенча, лицейның иң актив классына сулы шешә һәм кулер бүләк итте.

Бу көндә шулай ук Татарстан Милли музеенда да экологик агарту чаралары оештырылды, анда педагоглар һәм министрлык белгечләре күрү буенча мөмкинлекләре чикләнгән балаларны музей фондлары белән таныштырдылар.

Моннан тыш, министрлыкның махсуслашкан үзәк аналитик контроль лабораториясендә Казанның IT-лицее укучылары өчен экскурсия үткәрелде.

Экскурсия барышында балалар индустриаль ташлаулар һәм атмосфера һавасы, су, туфрак анализы, физик-химик анализ алымнары, биологик контроль, оператив контроль бүлегендә булдылар, анда җитәкчеләр үз эшчәнлекләре турында сөйләделәр, заманча стандартлы, суны, туфракны, атмосфера һавасын тикшерә торган эш җиһазларын һәм приборларын күрсәттеләр. Балаларга шулай ук атмосфера һавасының, суның һәм туфракның пычрануын оператив билгели торган, FordTransit автомобиле базасындагы күчмә экологик лаборатория күрсәтелде.

Әйтелгән чаралар буенча видеосюжетны http://tnv.ru/main/katalog/arhivnye_lenty/sreda_obitaniya/vypusk_ot_23_03_2013/ юнәлтмәсе буенча алырга мөмкин.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ