Татарстан Республикасы Экология һәм табигать ресурслары министрлыгы

Тармак-ара эш төркеменең икенче утырышы булып узды

2013 елның 25 феврале, дүшәмбе

Татарстан Экология һәм табигый байлыклар министрлыгында, министр урынбасары Тимур Акчурин рәислегендә, Чабаксар сусаклагычының су кимәлен нормаль булган 68 метр билгесенә кадәр күтәрү аркасында ихтимал булган негатив йогынтыны киметү буенча карар әзерләү максатыннан, Татарстан Республикасы Министрлар Кабинетының 17.09.2012 № 1680-р карары белән төзелгән Тармак-ара эш төркеменең икенче утырышы булып узды.

Утырышта проект әзерләүнең заказчысы “РусГидро” ААҖ, проектны әзерләүче “ИЦЭ Поволжья” ААҖ, Татарстан Гражданнар оборонасы һәм гадәттән тыш хәлләр министрлыгы, Ростехнадзорның Идел буе идарәсе, Татарстан Төзелеш, архитектура һәм торак-коммуналь хуҗалык министрлыгы вәкилләре, шулай ук фән вәкилләре катнашты.

Утырышта проектның заказчысы (“РусГидро” ААҖ) һәм әзерләүчесе (“ИЦЭ Поволжья” ААҖ) тарафыннан беренче утырыш беркетмәсенең пунктлары үтәлмәү, аерым алганда проект документлары составына түбәндәгеләрне кертү мәсьәләсе хәл ителмәү билгеләп үтелде:

1) проектлана торган гидротехник корылмаларның куркынычсызлык декларациясе;

2) Чабаксар ГЭСының су кимәлен 68 м проект билгесенә күтәргәч ихтимал булган гидротехник корылмалар авариясе нәтиҗәсендә физик затларның тормышына һәм саулыгына, физик һәм юридик затларның мөлкәтенә китерелергә мөмкин булган зыян күләме хисабы;

3) ният ителгән эшчәнлекнең Татарстан Республикасының әйләнә-тирәлегенә йогынтысын үз эченә алган ОВОС бүлеге.

Шуңа бәйле рәвештә, бер ай эчендә, “РусГидро” ААҖ тарафыннан, сусаклагычны 68 м кимәленә күтәргәндә Татарстан территориясенең куркынычсызлыгы мәсьәләләрен көйләү турында Татарстан Республикасы Хөкүмәте белән килешү әзерләтү турында карар кабул ителде. Килешү негатив йогынтыны булдырмау буенча төп чараларның үтәлешен исәпкә алырга, аңа кушымта итеп сусаклагычның аскы бьефына йогынты буенча проект документларын тапшыруның календар планы бирелергә тиеш.

Минераль чимал һәм су ресурслары идарәсе материаллары буенча.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ