Татарстан Республикасы Экология һәм табигать ресурслары министрлыгы

Ык буе территориаль идарәсенең эшчәнлек нәтиҗәләре

2013 елның 30 гыйнвары, чәршәмбе

Ык буе территориаль идарәсендә 2012 елгы эшчәнлек нәтиҗәләренә багышланган утырыш булып узды. Анда Татарстан Экология һәм табигый байлыклар министрлыгының җир асты байлыкларыннан файдалану мөнәсәбәтләрен көйләү идарәсе башлыгы Радик Гайнетдинов, Азнакай районы башлыгы вазифаларын башкаручы Нәҗат Нәгыймов катнашты.

Ык буе территориаль идарәсе башлыгы Хәлил Мөстәкыймов узган елда башкарылган эшләр турында сөйләде һәм алдагы елда үтәлергә тиешле төп бурычларны атады. Аның сүзләренә караганда, идарәнең 2012 елгы эшчәнлеге, әйләнә-тирәлекне саклау мәсьәләләре буенча федераль һәм республика дәүләти идарә органнары белән тыгыз бәйләнештә торып, әйләнә-тирәлекнең уңай торышын тәэмин итүгә һәм тармакка караган территорияләргә техноген йөкләнеш кимәлен төшерүгә юнәлтелгән булган. Шулай ук ул, ел эчендә территориаль идарә тармакка караган территорияләрнең башкарма комитетлары һәм администрация башлыклары белән тыгыз хезмәттәшлектә булды, дип билгеләп үтте. Закон бозучыларны 20.25., 7.3, 8.14, 8.15, 8.42 һ.б. статьялар буенча административ җаваплылыкка тарту максатында күзәтчелек эшенең нәтиҗәлелеген күтәрү мәсьәләләре тикшерүгә чыгарылган. Идарәнең суд практикасында катнашуы җәһәтеннән уңай тенденция күзәтелгән. Экологик контроль буенча төп эшләрдән тыш, территориаль идарә өзлексез экологик белем бирү системасын яклау һәм үстерүдә, экологик белемнәрне пропагандалауда һәм Татарстанда яшь буынга экологик тәрбия бирүдә актив катнашкан.

Радик Гайнетдинов Ык буе территориаль идарәсенең 2012 елгы эшчәнлеген тулаем уңай бәяләде, эшнең нәтиҗәлелеген күтәрергә теләк белдерде.

Нәҗат Нәгыймов исә Азнакай районы авылларында калдыкларны вакытлыча туплауны оештыру мәсьәләләренә тукталды һәм, моның өчен бюджет чыганакларыннан 4 млн сум бүленгән, дип белдерде.

Ык буе территориаль идарәсе материаллары буенча.

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ