Кошларга кыш чыгарга ярдәм итәбез!
Чистай районының 16нчы балалар бакчасына йөрүче сабыйлар җимлекләр күргәзмәсендә катнашкан. Чарада шулай ук Татарстан Республикасы Экология һәм табигать ресурслары министрлыгының Идел-Кама территориаль идарәсе инспекторлары катнашкан. Җимлекләр сабыйлар һәм аларга ярдәм итүчеләрнең иҗади рухы, таланты нәтиҗәсендә төрледән-төрле һәм бик тә матур килеп чыккан: төрле ысул белән, төрле материаллардан эшләнгән. “Сабыйларда экологик аң-белемнәр булдыру, канатлы дусларыбызга карата мәхәббәт тәрбияләү – акциянең төп максаты әнә шул”, – дигән фикердә экологлар. Балалар тәрбиячеләре һәм инспекторлар белән ишегалдына җимлекләр элеп куйган һәм канатлы дусларны кайгыртырга вәгъдә биргән. Кышлаучы кошларны ашату канатлы дусларыбызга ярдәм генә түгел, мәктәпкәчә яшьтәге балаларны өйрәтү-тәрбияләү эше өчен дә бик мөһим әле. Шул рәвешле балалар кышны бездә үткәрүче кошкайлар турында күбрәк белүгә ирешә, аларны тышкы кыяфәте һәм үзенчәлекләре буенча танырга өйрәнә, әйләнә-тирә мохит белән үзара бәйлелекләренә төшенә, – ди тәрбиячеләр.