РФ хөкүмәте Россия Табигать министрлыгы төзегән 2012–2020 елларда “Әйләнә-тирәлекне саклау” дәүләт программасын раслады

Документ көнүзәк экологик проблемаларны чишү һәм тотрыклы үсешкә күчү өчен нигез булырга тиешле. Дәүләт программасы экологик юнәлешле “яшел үсеш”не экономик яктан стимуллауга юнәлтелгән хокукый көйләү чараларын да, әйләнә-тирәлекнең торышын яхшырту буенча практик чараларны да бербөтен системага бәйли.

Программаның мөһим юнәлешләре: әйләнә-тирәлекнең сыйфатын көйләү, биологик төрлелекне саклау һәм үстерү, гидрометеорология һәм әйләнә-тирәлеккә күзәтчелек системасын үстерү, Антарктидадагы эшләрне һәм фәнни тикшеренүләрне тәэмин итү.

Дәүләт программасын тормышка ашыру аркылы 2020 елга кадәр, 2007 елгы база белән чагыштырганда, бөтен эчке продукт берәмлегенә карата пычраткыч матдәләр чыгару һәм калдыклар ташлау күләме шактый кыскарачак, атмосфера һавасының пычрану дәрәҗәсе югары һәм бик югары булган шәһәрләр саны 2,7 тапкыр кимиячәк.

Программа кысаларында тупланылган зыяннарны бетерү буенча 10нан да ким булмаган өстенлекле проект тормышка ашырылачак, мәсәлән, Түбән Новгород өлкәсендәге “Кара упкын” рөхсәтсез индустриаль калдыклар чүплеген һәм “Ак диңгез” шлам туплавычын бетерү, Самара өлкәсендәге Урта Идел химикатлар заводы территориясен рекультивацияләү буенча, шулай ук Арктикада тупланган экологик зыяннарны бетерү буенча. Бу чараларны үтәү 27 кв. км чамасы пычранган җирләрне реабилитацияләргә, шулай ук россиялеләрнең экологик яшәү шартларын яхшыртырга мөмкинлек бирәчәк.

Күзәтүләр челтәрен үстерү аркылы регионнар буенча тәүлеклек һава торышы фаразларының дөреслеген 93–95%ка күтәрергә мөмкин булачак. Халкы 100 меңнән артык булган барлык шәһәрләрдә атмосфера һавасының пычрануын күзәтү системасы булдырылачак.

2020 елга кадәр 30дан артык яңа тыюлык, милли парк һәм федераль заказник төзү күздә тотыла, шулай итеп, Россия территориясенең 13.5%тан артыгы махсус саклаулы табигый территорияләрдән торачак.

Финанслауның тулай күләме 335.9 млрд сум булачак.

Программаны тормышка ашыру күпчелек күрсәткечләр буенча сизелерлек нәтиҗәләрне урта сроклы перспективада ук алырга мөмкинлек бирәчәк.

Дәүләт программасын төзегәндә Россия Федерациясенең 2030 елга кадәрге чорга экологик үсеш өлкәсендәге дәүләт сәясәте нигезләрендә, Россия Федерациясенең 2020 елга кадәрге чорга инновацион үсеш стратегиясендә билгеләнгән стратегик приоритетлар, шулай ук Россия Федерациясендә 2020 елга кадәрге чорда биотехнологияләрне үстерүнең комплекслы программасы чаралары исәпкә алынды.