Чүпне махсус полигоннарга озатырга!
Элекке полигон янына бик зур чүплек өеп куйганнар. Чирмешән районында рөхсәт ителмәгән урында калдыклар өеменең чираттагысы калкып чыккан. Закон бозу очрагын Татарстан Республикасы Экология һәм табигать ресурслары министрлыгының Көньяк-Көнчыгыш территориаль идарәсе хезмәткәрләре билгеләгән.
Чирмешән авыл җирлеге башкарма комитеты хезмәткәрләре хәбәр иткәнчә, әлеге участок аларның контрольлегендә тотыла, территория даими рәвештә чүп-чардан чистартыла һәм тигезләнелә, әмма чүплек һаман пәйда булып кына тора. Биредә яшәүчеләр әлеге территорияне “Солдат карьеры” дип йөртәләр икән хәтта.
Биредә чүп аударып калдыруны тыю билгесе урнаштырылса да, чүп-чар өю һаман дәвам итә. Экологлар барлык материалларны, тиешле чаралар күрү өчен, Чирмешән авыл җирлеге башкарма комитетына җибәргән.