Чистай гимназиясе укучылары көзге каникул алдыннан ЭКОдәрестә катнаштылар
Чистай районының 2нче гимназиясендә беренче чирек интеллектуаль ЭКОбәйрәм белән тәмамланды. Укучылар өчен танып белү чарасын педагоглар Татарстан Республикасы Экология һәм табигый байлыклар министрлыгының Идел-Кама территориаль идарәсе белгечләре белән бергә үткәрделәр. Экологлар балаларга республиканың табигый объектлары турында кызыклы мәгълүмат сөйләделәр, Кызыл китап белән таныштырдылар һәм уен үткәрделәр. Дәреснең гамәли өлеше кысаларында укучылар 6 командага бүленде, аларның һәркайсы үз экологик проектын тәкъдим итте. Балалар әйләнә-тирә мохитне саклауның Чистайда яшәүче һәркем игътибар итәргә тиешле төп мәсьәләләрен карандаш һәм буяулар белән плакатларда сурәтләде. Моннан тыш балалар аларны чишү юлларын да тәкъдим итте: даими рәвештә өмәләр, агачлар утырту буенча һәм калдыкларны аерым җыю буенча акцияләр үткәрергә. Идел-Кама идарәсе белгечләре укучыларның идеяләрен хуплады һәм макулатура җыю буенча чараларга стартны инде көзге каникулда бирергә, ә ЭКОакциянең йомгакларын уку елы ахырында ясарга мөмкин булачагы турында әйттеләр.
ТР ЭТБМ матбугат хезмәте