2017 елдан Россиядә эшкәртелергә тиешле калдыкларны күмү тыела
2017 елның 1 январеннан утильләштерелергә тиешле файдалы компонентлары булган калдыкларны күмү тыелачак. Андый калдык төрләре исемлеген РФ Хөкүмәте билгели, диелгән Россия Табигый байлыклар һәм экология министрлыгының рәсми сайтында. “Җитештерү һәм куллану калдыклары турындагы” законга үзгәрешләр табигать саклау һәм торак-коммуналь хуҗалык өлкәләренә карый һәм экономиканың яңа секторын – калдыклар эшкәртү индустриясен формалаштыру, калдыкларны шул көе күмү системасын бетерү өчен алшартлар тудыра, товар җитештерүчеләрнең, аны импортлаучы һәм төргәкләүчеләрнең ул товарны куллану үзлекләре югалганнан соң утильләштерергә бурычлы булуына нигезләнгән яңа экономик механизмны иңдерә.
Региональ хакимиятләр каты коммуналь калдыклар белән эш итүгә соң чик тарифларны билгеләргә, региональ операторларны сайларга, калдыклар белән эш итүнең программаларын һәм территориаль схемаларын әзерләргә бурычлы. Территориаль схема исә калдыклар барлыкка килүдән, аларның күләменнән, төрләреннән һәм куркынычсызлык классларыннан алып аларны эшкәртү, утильләштерү, зарарсызлау, урнаштыруга кадәрге бөтен чылбырны үз эченә алырга тиеш. Ә бу калдыклар белән эш итүнең йомык циклларын булдырып, аларны хуҗалык әйләнешенә кайтарта, күмеп кенә куярга юл калдырмый. Россия Федерациясе субъектларында бу эш 2016 елның 26 сентябренә кадәр төгәлләнергә тиеш.
Министрлыкның матбугат хезмәте