Лаеш районында тагын бер законсыз карьер ачыкланды
Татарстан Экология һәм табигый байлыклар министрлыгының Дәүләти экологик күзәтчелек инспекциясе белгечләре, Столбище полиция бүлеге хезмәткәрләре белән бергә, “кайнар эз” буенча, Лаеш районы Тетеево авылында лицензиясез ком чыгаручы 2 үзбушаткычны һәм фронталь төягечне тоткарлап полиция бүлеге стоянкасына китерде. Законсыз карьерның мәйданы 100 кв.метрдан артык. РФ КоАП 7.3 ст. 1 ө. буенча беркетмә төзелде. Әйләнә-тирәлеккә салынган зыян күләме исәпләнә.
Билгеле булганча, табигать саклау законнары бозылу турында Республика иҗтимагый экологик кабулиятенә хәбәр итәргә мөмкин: кайнар элемтә телефоны (843)267-68-67, электрон почтасы eco.signal@tatar.ru. Хәбәрне “Халык контроле” системасына да җибәрергә була, гомуми белем бирү оешмаларында укучылар өчен махсус “Мәктәп экопатруле” мобиль кушымтасы бар. Табигать саклау законнары бозылу турында фото- я видеотеркәүле оператив белешмәләр биргән гражданнарга акча түләнә.
Министрлыкның матбугат хезмәте