Бүген Татарстанда территорияләрне чистарту буенча санитар-экологик икеайлык башланды
1 апрельдән 31 майга кадәр республиканың барлык табигать саклау службалары, профильле министрлык һәм тармаклары, муниципаль берәмлекләрнең башкарма комитетлары шәһәр һәм муниципаль район территорияләрен чистарту, тиешле санитар-экологик торышка китерү максатыннан санитар-экологик икеайлык үткәрәләр.
Икеайлык көннәрендә дәүләт хезмәтләре порталы һәм мобиль коммуникация җайланмалары аша гражданнардан мөрәҗәгатьләр кабул итү буенча берничә сервис эшкә кушыла. Аерым алганда – “Халык контроле” системасы, яңа “Мәктәп эко-патруле” системасы, соңгысы аша һәр укучы бала инде бүген үк ачыкланган чүплекләр турында хәбәр итеп күзәтчелек органнарына булыша ала. 1 апрельдән башлап гражданнар табигать саклау законнары бозылу турында 267-68-67 кайнар линия телефонына һәм eco.signal@tatar.ru электрон почтасына хәбәр тапшыра алалар.
Икеайлык кысаларында күзәтчелек органнары ачыклаган барлык рөхсәтсез калдык ташлау урыннары “Экологик карта” геоинформация системасына (www.ecokarta.tatar.ru) салыначак.
Министрлыкның матбугат хезмәте