Санитар-экологик икеайлыкка йомгак ясалды

Бүген Татарстан Республикасы Министрлар Кабинетында республикада үткәрелгән санитар-экологик икеайлык йомгаклары буенча брифинг уздырылды.
Татарстан экология һәм табигый байлыклар министры Артем Сидоров журналистларга, 1 апрельдән 1 июньгә кадәрге рейд тикшерүләрендә дәүләт инспекторлары 5567 табигать саклау законнарын бозу очрагын ачыклады, дип белдерде. Административ җаваплылыкка 182 юридик зат тартылган, вазифалы һәм физик затларга 4475 беркетмә төзелгән. Салынган штрафларның тулай суммасы – 26 миллион 530 мең сум. Икеайлык чорында ачыкланган 1217 рөхсәтсез чүплекнең 1085е, ягъни 89%ы бетерелгән.
Министрның әйтүенчә, торак пунктлар янындагы территорияләргә аерата игътибар бирелгән, Казан янындагы бистәләрнең санитар-экологик торышы аерым контрольдә тотылган. Икеайлыкны үткәрүдә, бигрәк тә ял урыннарын җыештыруда республика халкы, җәмәгать оешмалары актив катнашкан. Экология министрлыгы һәм муниципалитетлар ярдәме белән республиканың барлык районнарында 132 мәйданда күләмле җыештыру акцияләре оештырылган. Республика дәүләт структураларының, федераль күзәтчелек органнарының, прокуратура органнарының, хәбәр чараларының килешенеп эшләве һәм җәмәгатьчелекнең актив яклавы аркылы район һәм шәһәр округлары территорияләренең тиешле санитар-экологик торышы тәэмин ителгән.
Министрлыкның матбугат хезмәте